संजय राऊत यांनी समाजात
चुकीची माहिती पसरवू नये

नितेश राणे ः अन्यथा वस्त्रहरण करू

कणकवली,ता. ३ ः भाजप,संघ आणि आमच्या नेत्यांवर संजय राऊत यांनी चुकीच्या पद्धतीने टीका करणे थांबवावे. मराठा समाजात जरांगे पाटील यांच्याबाबत चुकीची माहिती पसरवू नये. अन्याथा संजय राऊत यांचे वस्त्रहरण करू, असा इशारा भाजप प्रवक्ते, आमदार नीतेश राणे यांनी दिला आहे.
याबाबत त्यांनी दिलेल्या एका पत्रकात म्हटले आहे की, राऊत यांच्या घरातील महाभारत आम्ही सांगितले तर महाराष्ट्र त्यांचे तोंड बघणार नाही. ठाकरे व पवार कुटुंबियांत ज्या काड्या लावल्या त्यामुळे गलिच्छ राजकारण झालय. या सर्वांचा मुख्य सूत्रधार, शकुनी मामा संजय राजाराम राऊत आहे. भगव्याच्या नावाने राजकारण करणारे उद्धव ठाकरे आणि संजय राऊत हे सर्वांत मोठे कलंक आहेत. भाजपची नीती तालिबान सारखी असल्याचा जावई शोध राऊत यांनी लावला. मुख्यमंत्री होण्याचे स्वप्न भंग झाल्यापासून ठाकरे व पवार कुटुंबियांत जे होतंय तो त्यांचा राग आहे. संजय राऊत स्वतःला मुख्यमंत्री करण्यासाठी शरद पवार यांच्याकडे पायघड्या घालून होता. जरांगेविषयी पत्रकात म्हटले आहे की, मनोज जरांगेना कोणीही अटक करणार नाही. उगाच कोण तुमचे कान भरत असेल तर त्याचे ऐकू नका. लागलेच तर तुमची बाजू सरकारकडे मांडू. तुमचा भाऊ सरकारमध्ये आहे, मराठा आणि ओबीसीमध्ये वाद निर्माण करून हिंदू समाजात वाद पेटवण्याचे काम जिहादी करत आहेत. त्याला आमच्यातील काही फितूर लोक मदत करत आहेत. राम मंदिरमुळे हिंदू एकत्र येतील, अशी भीती असल्याने आमच्यातील गद्दारांना एकत्र घेऊन जिहादी वाद निर्माण केला जात आहे, असा आरोप राणे यांनी केला आहे.