रत्नागिरी : उन्हाचा कडाका वाढल्यानंतर मार्च महिन्याच्या अखेरीस आणि एप्रिलच्या सुरुवातीला वाशी मार्केटमधील हापूस आंब्याची (Konkan Hapus Mango) आवक वाढली आहे. सलग चार दिवस ५० ते ५५ हजार पेटी दाखल होत होती. आवक वाढल्यामुळे दर दोन ते अडीच हजार रुपयांपर्यंत कमी झाले आहेत.

हवामान विभागाच्या (Meteorology Department) अंदाजानुसार, यंदा उष्मा अधिक जाणवत आहे. तापमानाचा पारा ३७ अंशापर्यंत वर गेला होता. त्यामुळे झाडावरील फळं वेगाने तयार होत आहेत. मार्चच्या पहिल्या आठवड्यात पाच डझन पेटीचा दर साडेचार हजार रुपयांपर्यंत होता. तो पुढे कमी होत गेला. २६ मार्चला कोकणातून ३६ हजार पेटी आंबा वाशीत दाखल झाला होता. त्यानंतर २७ ला त्यात मोठी वाढ झाली.

५४ हजार ५७ पेट्या कोकणातून पाठवण्यात आल्या होत्या. सलग चार दिवस त्या टप्प्यातच पेट्या जात होत्या. १ एप्रिलला ६४ हजार पेटी आंबा बाजारात दाखल झाल्याचे वाशी बाजार समितीमधून सांगण्यात आले. त्यानंतर २ एप्रिलला ४२ हजार, ३ ला ३८ हजार आणि ४ ला ४२ हजार पेटी दाखल झाल्या आहेत. यंदा फेब्रुवारी आणि मार्च या दोन्ही महिन्यात कधी नव्हे एवढी आवक बाजारात होती.

सुरवातीला दर अधिक असल्यामुळे ग्राहकांकडून मागणीही कमी असते. निर्यातही सुरू झालेली नसते. त्यामुळे मोठ्या प्रमाणात आंबा बाजारात आल्याने त्याचा दरावर परिणाम होतो, असे वाशीतील व्यावसायिकांचे मत आहे. पहिल्या बहरातील आंबा संपुष्टात आला असून, आता १० ते १५ एप्रिलपर्यंत पेटींची संख्या कमी राहील, असा अंदाज बागायतदारांकडून वर्तवला जात आहे. दर चांगला मिळत असल्यामुळे काही बागायतदारांकडून कमी दर्जाची किंवा कोवळी फळं पाठवल्याचे प्रकारही पुढे आले होते. हा टक्का अधिक राहिल्यामुळे त्याचा परिणाम दरावर होत असल्याचे व्यावसायिकांचे म्हणणे आहे.

थ्रीप्सने थैमान

नोव्हेंबर, डिसेंबर महिन्यामध्ये आलेल्या मोहोराला चांगल्या प्रकारे फळधारणा झाली होती. त्याच्यानंतर डिसेंबरअखेरीस थोड्याफार प्रमाणात मोहोर आला होता. नंतर जानेवारी महिन्यामध्ये तिसऱ्‍या टप्प्यात मोठ्या प्रमाणात मोहोर आला होता; परंतु, या मोहोरावर थ्रीप्सने थैमान घातले होते. त्यामुळे या वर्षीच्या उत्पादनावर लगाम लागला आहे.