कोकण रेल्वेच्या जादा गाड्यांचे
उन्हाळी वेळापत्रक विस्कळित
सकाळ वृत्तसेवा
कणकवली, ता. १५ ः उन्हाळी हंगामासाठी कोकण रेल्वेमार्गावर धावणाऱ्या जादा गाड्यांचे वेळापत्रक गेल्या काही दिवसांपासून विस्कळित झाले आहे. या मार्गावर सोडलेल्या जादा गाड्या तब्बल दहा ते पंधरा तास उशिराने धावत आहेत. आज एलटीटी ते मडगाव धावणारी जादा रेल्वेगाडी तब्बल १२ तास उशिराने धावत होती. याबाबत प्रवाशांनी मात्र नाराजी व्यक्त केली आहे.
प्रवाशांनी दिलेल्या माहितीनुसार, कोकण रेल्वेमार्गावर उन्हाळी हंगामासाठी मध्य रेल्वेच्या समन्वयाने रेल्वेच्या जादा फेऱ्या सुरू केल्या आहेत. एप्रिलपासून या फेऱ्या सुरू झाल्या आहेत. मात्र, या मार्गावरील जादा फेऱ्यांचे वेळापत्रक विस्कळित झाले आहे. एलटीटी ते मडगाव (गाडी क्र. ०१०१७) आठवड्यातून शुक्रवार, रविवार आणि मंगळवारी एलटीटीहून सुटते. परतीसाठी ०१०१८ ही गाडी मडगाव येथून दर सोमवार, बुधवार आणि शनिवारी धावते. मात्र, यासाठी रेल्वेचा एकच रेक वापरण्यात आला आहे. गेल्या आठवड्यापासून या गाडीचे वेळापत्रक विस्कळित झाले आहे. मुंबईकडे जात असताना मडगाव येथूनही गाडी तब्बल सहा ते सात तास उशिराने सोडली जात आहे. त्यामुळे प्रवाशांचे हाल होत आहेत. यासह एलटीटी ते थिवी ही विशेष गाडी एलटीटी येथून शनिवार, सोमवार, बुधवारी धावते. परतीसाठी थिवी येथून ०११३० ही गाडी दर रविवार, मंगळवार आणि गुरुवारी धावते. याही गाडीचे वेळापत्रक सध्या विस्कळित झाले आहे. या दोन्ही गाड्यासाठी एकच रेक वापरला जात असल्याने या गाड्यांचे वेळापत्रक विस्कळित झाले आहे.
---
‘कोरे’ मार्गावर साप्ताहिक विशेष गाडी
उन्हाळी कालावधीत प्रवाशांची वाढती संख्या लक्षात घेऊन रेल्वेमार्गावर लांब पल्ल्याची वास्को द गामा-मुझफ्फरपूर-वास्को द गामा साप्ताहिक विशेष गाडी सोडण्यात आली आहे. प्रवाशांचा प्रतिसाद पाहून या गाडीला मुदतवाढ देण्यात आली आहे. त्यानुसार वास्को द गामा-मुझफ्फरपूर (०७३०९) १५ मे ते १६ जून, तर मुझफ्फरपूर- वास्को द गामा (०७३१०) १८ मे ते १५ जून या कालावधीत धावणार असल्याची माहिती कोकण रेल्वे प्रशासनाने दिली आहे. या गाडीला सिंधुदुर्गात सावंतवाडी स्थानकावर थांबा आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.