89218

प्रत्‍येकाने वृक्ष लागवडीचा संकल्‍प करावा

डी.पी. तानावडे : कणकवलीत वृक्षारोपण

कणकवली, ता.१० : रस्ते, महामार्ग, गृहसंकुले आदींची उभारणी करताना हजारो, लाखो वृक्षांची कत्तल होत आहे. याचा थेट परिणाम निसर्गावर होत आहे. त्‍यामुळे पर्यावरणाचे संतुलन राखण्यासाठी प्रत्‍येकाने वृक्ष लागवडीचा संकल्‍प करून प्रत्‍यक्षात कृती करावी, असे आवाहन नगरवाचनालयाचे सह कार्यवाह डी.पी.तानावडे यांनी केले.
राज्‍य शासनाच्या वनमहोत्सव कार्यक्रमांतर्गत येथील नगरवाचनालय परिसरात वृक्षारोपण करण्यात आले. याप्रसंगी श्री. तानावडे बोलत होते. यावेळी वाचनालयाचे कार्यवाह हनीफ पिरखान, नगरपंचायतीचे प्रशासकीय अधिकारी अमोल अघम, वैयजंती करंदीकर, प्रशांत राणे, विनोद जाधव, वाचनालयाचे कर्मचारी पूजा मांणगावकर, चेतना आचार्य आदी उपस्थित होते. तानावडे म्‍हणाले, ‘‘ग्लोबल वार्मिंगमुळे दुष्काळ पडणे, अतिवृष्टी होणे, अवकाळी पाऊस पडणे, तापमान वाढ अशी परिस्थिती उद्भवत आहे. निसर्गाचा समतोल बिघडू नये म्हणून वृक्षांची तोड थांबविणे गरजेचे आहे. याकरिता समाजातील सर्व घटकांनी पुढाकार घ्यावा.’’ यावेळी उपस्थितांनी नगरवाचनालयाच्या परिसरात विविध जातींचे वृक्षारोपण करण्यात आले.