माजी उपनगराध्यक्ष नागवेकर
शिवसेनेच्या वाटेवर?

रत्नागिरी, ता. ५ ः शहरातील प्रभाग 11मधील शिवसेना उद्धव बाळासाहेब ठाकरे पक्षातील पदाधिकारी पुढील तीन दिवसात मुख्यमंत्री शिंदे यांच्या शिवसेनेमध्ये प्रवेश करणार आहेत. माजी उपनगराध्यक्षांसह नगरसेवक व काही प्रमुख पदाधिकारी पालकमंत्री उदय सामंत यांच्या उपस्थितीत हा प्रवेश करणार आहेत.
रत्नागिरी शहराच्या खालील भागातील मुरुगवाडा परिसरातील अनेक पदाधिकारी शिवसेनेमध्ये प्रवेश करण्याच्या हालचाली करीत आहेत. पालकमंत्री उदय सामंत यांनी शहरात सुरु केलेल्या विकास पर्वावर विश्वास ठेवत त्यांनी हा निर्णय घेतला आहे. लोकसभा निवडणुकीपर्यंत ठाकरे सेनेसोबत कार्यरत राहून खासदार विनायक राऊत यांच्यासाठी मेहनत घेणारे माजी उपनगराध्यक्ष राकेश नागवेकर यांनी नागरिकांचे प्रश्न सोडवण्यासाठी पालकमंत्री उदय सामंत यांच्यासोबत जाण्याचा निर्णय घेतला असल्याची चर्चा आहे.