वारकऱ्यांना टोल माफी

परिवहन विभागाचा आदेश ; आरटीओत पासची सुविधा
सकाळ वृत्तसेवा
रत्नागिरी, ता. ८ : आषाढी वारीनिमित्त कोकणातून पंढरपूरला जाणाऱ्या वारकरी तसेच भाविकांना टोल माफी करण्यात आली आहे. ही सवलत मिळण्यासाठी येथील उपप्रादेशिक परिवहन कार्यालयातून पासेस जारी करण्यात आले आहेत.
मुख्यमंत्री एकनाथ शिंदे यांच्या अध्यक्षतेखाली याबाबत १४ जूनला बैठक आयोजित करण्यात आली होती. त्यामध्ये आषाढीवानित्त कोकणातून पंढरपूर जाणाऱ्या पाणख्या, भाविक व वारकऱ्यांना २४ ते २९ जुलै या कालावधीसाठी रत्नागिरीतून पंढरपूरला जाणाऱ्या रस्त्यांवरील वाहनांना टोलमधून सूट मिळावी म्हणून परिवहन विभागाने टोल पास जारी केले आहेत. त्या अनुषंगाने रत्नागिरी उपप्रादेशिक परिवहन कार्यालयामार्फत आवाहन करण्यात येते की, कोकणातून पंढरपूरला जाणाऱ्या भाविकांनी व वारकरी त्यांच्या वाहनाचे मुदतीतील सर्व कागदपत्र उपप्रादेशिक परिवहन कार्यालयात सादर करावे. त्यांना ४ ते २१ जुलै या कालावधीसाठी या कार्यालयातून टोल पास जारी करण्यात आले आहेत. तरी सर्व भाविकांनी व वारकऱ्यांनी यांची नोंद घ्यावी, असे आवाहन रत्नागिरी आरटीओने केले आहे.