चिपळूण : दरड दुर्घटनेनंतर वाहतुकीसाठी बंद करण्यात आलेला मुंबई-गोवा महामार्गावरील परशुराम घाट १४ तासांनंतर बुधवारी (ता. ९) सकाळी खुला करण्यात आला. दुहेरी वाहतूक सुरू करण्यात आली. दरम्यान, वरिष्ठ अधिकाऱ्यांनी घाटाची पाहणी केल्यानंतर येथे सुमारे ३०० मीटर लांबीची संरक्षण भिंत बांधण्याचा निर्णय घेण्यात आला असून, येत्या दोन दिवसांत या कामाला सुरुवात करण्यात येणार आहे.

तसेच भूवैज्ञानिकांचे पथकदेखील पाहणी करणार असून, त्यानंतर पुढील निर्णय घेतले जाणार आहेत.दरड कोसळल्यानंतर घाटातील वाहतूक पूर्णतः बंद केली होती. राष्ट्रीय महामार्ग विभागाचे वरिष्ठ अधिकाऱ्यांनी घाटाची पाहणीदेखील केली. तसेच परिस्थिती पूर्वपदावर आणण्यासाठी तातडीने कार्यवाही सुरू करण्यात आली. बुधवारी दुपारी प्रथम एकेरी व नंतर दुहेरी वाहतूक सुरू करण्यात आली. त्यामुळे मुंबई गोवा महामार्गावरील वाहतूक आता सुरळीत झाली आहे.