खेड (रत्नागिरी) :  कुविख्यात अंडरवर्ल्ड डॉन दाऊद इब्राहिम याचे मूळगाव असलेल्या मुंबके येथील ६ वडिलोपार्जित मालमत्तांच्या लिलावानंतर लोटे येथे पेट्रोलपंपासाठी खरेदी केलेल्या भूखंडाचा १ डिसेंबरला लिलाव होणार आहे. त्यानुसार स्मगलिंग अँण्ड फॉरेन एक्सेंज मॅनिप्युलेशन व केंद्रीय वित्त मंत्रालयाच्या अधिकाऱ्यांनी मंगळवारी जागेची पाहणी केली. या लिलाव प्रक्रियेकडेच आता साऱ्यांच्या नजरा रोखल्या आहेत.

 मुंबकेतील दाऊदच्या ६ मालमत्तांची लिलाव प्रक्रिया १० नोव्हेंबर रोजी व्हिडिओ कॉन्फरन्सद्वारे पार पडली. दाऊदचा दुमजली बंगला दिल्लीतील अँड. अजय श्रीवास्तव यांनी ११ लाख ३० हजाराची बोली लावून विकत घेतला. याशिवाय १५३ सर्व्हे व क्रमांकाची मालमत्ता ४ लाख ३ हजार रुपयांना खरेदी केली होती अन्य चार मालमत्ता सर्वोच्च न्यायालयातील वकील भूपेंद्र भारद्वाज यांनी ७ लाख १८ हजार रूपयांना खरेदी केल्या होत्या. 

मुंबकेतील ६ मालमत्तांच्या लिलाव प्रक्रियेनंतर लोटे येथे ३० गुंठे क्षेत्रात असलेल्या १ डिसेंबरला होणार आहे. दाऊद याने हा भूखंड पेट्रोलपंपासाठी खरेदी केला होता, अशी माहिती जाणकार देतात. या भूखंडाचाही व्हिडीओ काँन्फरन्सव्दारे लिलाव होणार आहे. यापाश्वभूमीवर स्मगलिंग अँण्ड फॉरेन एक्सेंज मॅनिप्युलेशन व केंद्रीय वित्त मंत्रालयाच्या अधिकाऱ्यांनी बोलीधारकांसह भूखंडाची पाहणी केल्याची माहिती काल उशिरा मिळाली.

संपादन- अर्चना बनगे