17-year-old Badminton player died due to cardiac arrest: क्रीडा विश्वातून एक धक्कादायक माहिती समोर आली आहे. चीनच्या १७ वर्षीय बॅडमिंटनपटूचे दुर्दैवी निधन झाले आहे. झँग झिजे असे त्याचे नाव असून त्याला सामना खेळत असतानाच हृदयविकाराचा झटका आला आणि त्यातच त्याने अखेरचा श्वास घेतला.

रविवारी रात्री उशीरा आशिया ज्युनियर चॅम्पियनशीप स्पर्धेत जपानच्या काझुमा कवानो विरुद्ध खेळताना पहिल्या गेमवेळी तो अचानक कोर्टवर कोसळला. त्यानंतर तात्काळ त्याच्यावर उपचार करण्यात आले. त्यानंतर त्याला अँब्युलन्समधून जवळच्या हॉस्पिटलमध्ये हालवण्यात आले होते. पण अनेक प्रयत्नांनंतरही त्याचा जीव वाचवण्यात अपयश आले.

एएफपीने दिलेल्या वृत्तानुसार इंडोनेशिया बॅडमिंटन असोसिएशनचे प्रवक्ते ब्रोटो हॅपी यांनी सांगितले, 'वैद्यकिय निष्कर्षानंतर त्याला आचानक हृदयविकाराचा झटका आल्याचे समजत आहे.' तसेच प्रवक्त्यांनी दिलेल्या माहितीनुसार झँगचे पालक पुढील प्रक्रियेसाठी इंडोनेशियाला येत आहेत.

त्याच्या निधनाबद्दल जागतिक बॅडमिंटन फेडरेशननेही दु:ख व्यक्त केले आहे.

भारताची स्टार बॅडमिंटनपटू पीव्ही सिंधूनेही झँगच्या निधनाबद्दल दु:ख व्यक्त केले असून तिने सोशल मीडियावर लिहिले, 'मी झँगच्या कुटुंबाबद्दल सहानुभूती व्यक्त करते. जगाने आत एक प्रतिभाशाली खेळाडू गमावला आहे.'

झँगच्या निधनाबद्दल चीन बॅडमिंटन असोसिएशननेही दु:ख व्यक्त केले आहे. झँग चीनचा उदयोन्मुख बॅडमिंटनपटू होता. दरम्यान त्याच्या निधनानंतर स्पर्धेत चीनचे खेळाडू काळी पट्टी दंडाला बांधून उतरले होते.