क्रिकेटच्या मैदानात फार कमी वयात लक्षवेधी खेळी करुन चर्चेत आलेले खेळाडूंची अनेक नावे तुम्ही ऐकली असतील. पण जर तुम्हाला कोणी सांगितले की 91 वर्षांच्या वयात एखादा माणूस क्रिकेटच्या मैदानात उतरण्याची तयारी करतोय तर तुमची रिअ‍ॅक्शन काय असेल? ज्या वयात माणसाला चालणंही कठीण असते त्या वयात पॅड बांधून कोणी मैदानात कशाला उतरेल? असा प्रतिप्रश्नही तुम्ही कराल. पण याच उत्तर एका व्यक्तीकडे आहे. कारण तो स्वत: वयाची नव्वदी पार केल्यानंतर क्रिकेटच्या मैदानात उतरण्यास सज्ज झालाय.

ऑस्‍ट्रेलियात वयोवृद्धांसाठी एक क्रिकेट लीग होते. वयाच्या तिशीनंतर क्रिकेटच्या मैदानापासून दूर गेलेले आणि वयाची साठी पार केलेली मंडळींसाठी ऑस्ट्रेलियात खास लीग भरवली जाते. या लीगमध्ये डग क्रोवेल (Doug Crowell) वयाच्या 91 वर्षी मैदानात उतरणार आहेत. जवळपास 15 वर्षे ते या लीगमध्ये खेळत आहेत. एबीसी न्‍यूजला दिलेल्या मुलाखतीमध्ये ते म्हणाले की, अजूनही क्रिकेट खेळण्याचा आनंद घेत आहे. पुन्हा मैदानात उतरण्यासाठी स्वत:ला फिट ठेवले असून या वयात बॅट आणि चेंडू यांच्यातील ताळमेळ साधणे पूर्वीपेक्षा सोपे असते. चेंडू हळूवार बॅटवर येत असल्यामुळे शॉट सिलेक्शनसाठी वेळ मिळतो. जेव्हा माझी निवड होते तेव्हा तेव्हा मी क्रिकेटचा पूर्ण आनंद घेऊन खेळण्यास तयार असतो, असेही ते म्हणाले.

डग क्रोवेल (Doug Crowell) पुढे म्हणाले की, 'आम्ही कठीण परिस्थितीत क्रिकेट खेळायला शिकलो. आमच्यासाठी सर्वोत्तम मैदानाचा अभाव आहे. मैदान करण्यासाठी आवश्यक उपकरणही आमच्याकडे नव्हती. या परिस्थितीत खेळताना खूप तयारी करावी लागायची. कठोर परिश्रमामुळे आजही फिट असून खेळण्यासाठी उत्सुक आहे, असे त्यांनी म्हटले आहे. 1946 मध्ये त्यांनी विंटन क्रिकेट क्‍लब तयार केला. कठीण परिस्थितीत खेळल्याचा फायदा झाला. त्यामुळेच इतक्या वयानंतरही खेळू शकतो, असे ते मानतात. फिटनेससाठी ते आठवड्यातून तीन वेळा टेनिस खेळण्यावरही भर देतात.