Asia Cup 2023: आशिया कपमध्ये भारताविरुद्धच्या दारूण पराभवानंतर पाकिस्तान कर्णधार बाबर आजमला मोठा धक्का बसला आहे. भारताविरुद्धच्या सामन्यात पाकिस्तानचे तीन खेळाडू जखमी झाले आहेत. उर्वरित सामन्यांमध्ये पाकिस्तानचे स्टार गोलंदाज हरिस रौफ आणि नसीम शाह खेळणार की नाही हे अद्याप निश्चित नाही. पाकिस्तानचा धडाकेबाज फलंदाज आगा सलमानही रूग्णालयात असून तोही स्पर्धेतून बाहेर जाऊ शकतो.

पाकिस्तानचा स्टार वेगवान गोलंदाज हारिस रौफ भारताविरुद्ध पहिल्यांदा बाहेर झाला गेला. रौफने राखीव दिवशी गोलंदाजी केली नाही आणि तो मैदानाबाहेर गेला. हाताच्या समस्येमुळे नसीम शाह भारतीय डावाच्या 49व्या षटकात मैदानाबाहेर गेला आणि फलंदाजीसाठी मैदानातही परतला नाही. या दोन्ही खेळाडूंच्या दुखापती गंभीर असल्याचे सांगण्यात येत आहे. सध्या पाकिस्तानचे वैद्यकीय पथक दोन्ही खेळाडूंच्या फिटनेसवर लक्ष ठेवून आहे.

दुखापतीचे गांभीर्य लक्षात घेऊन पाकिस्तानने बॅकअप खेळाडूंना श्रीलंकेत बोलावले आहे. बॅकअप म्हणून शाहनवाज धानी आणि जमान खान यांना श्रीलंकेत बोलावण्यात आले आहे. हरिस रौफ आणि नसीम शाह यांचे फिटनेस अपडेट मंगळवारी समोर येणार आहे. हे दोन खेळाडू स्पर्धेतून बाहेर पडल्यास शाहनवाज धानी आणि जमान खान यांचा संघात समावेश होईल.