Asia Cup 2023 Shreyas Iyer : आशिया कपदरम्यान श्रेयस अय्यरच्या दुखापतीमुळे टीम इंडियाची डोकेदुखी वाढली आहे. अय्यर सहा महिन्यांच्या प्रदीर्घ कालावधीनंतर क्रिकेटच्या मैदानात परतत होता. पण दोन सामने खेळल्यानंतर अय्यरला पुन्हा दुखापत झाली.

आधी तो पाकिस्तानविरुद्धच्या सामन्यातून बाहेर पडला होता. यानंतर पूर्णपणे तंदुरुस्त नसल्यामुळे तो श्रीलंकेविरुद्ध खेळू शकणार नसल्याची माहिती मिळाली. खराब फिटनेसमुळे अय्यरला टीम इंडियातील स्थान टिकवणे कठीण झाले आहे.

श्रेयस अय्यरचीही वर्ल्ड कप संघात निवड झाली आहे. अय्यरची खराब तंदुरुस्ती पाहता संघ व्यवस्थापन अन्य पर्यायांचाही विचार करू शकेल, असे दिसत आहे. सध्या सूर्यकुमार यादव बॅकअप पर्याय म्हणून संघासोबत आहे. यासोबतच अय्यर तंदुरुस्त नसल्यास तिलक वर्मा आणि संजू सॅमसन यापैकी एकाला वर्ल्ड कपसाठी संघात स्थान मिळू शकते. बीसीसीआयकडे 28 सप्टेंबरपर्यंत संघात बदल करण्याचा पर्याय आहे.

असं असलं तरी श्रेयस अय्यरला परत प्लेइंग 11 मध्ये स्थान मिळवणं जरा कठीण होईल. कारण इशान किशनला काही संधी मिळाल्या आहेत, ज्याचा फायदा त्याने घेतला आहे. किशनने 2 सप्टेंबर रोजी पाकिस्तानविरुद्ध खेळल्या गेलेल्या सामन्यात 82 धावांची शानदार खेळी केली होती. याआधी त्याने वेस्ट इंडिजविरुद्ध सलग तीन अर्धशतके झळकावली होती. त्याच्या उत्कृष्ट फॉर्ममुळे त्याला डावलून संघाला अय्यरला संधी देणे सोपे जाणार नाही.

केएल राहुलच्या दुखापतीमुळे अय्यरचे पुनरागमन करणे सोपे झाले. पण आता राहुल केवळ संघात परतला नाही तर तो मुख्य यष्टिरक्षकाची भूमिकाही बजावत आहे. राहुलने पाकिस्तानविरुद्धच्या सामन्यात नाबाद शतक झळकावून मधल्या फळीत टीम इंडियासाठी तो इतका महत्त्वाचा का आहे हे सिद्ध केले आहे. किशन आणि राहुल तंदुरुस्त नसेल तरच अय्यरला पुनरागमन करण्याची संधी आहे.