PAK vs ENG World Cup 2023 : पाकिस्तानचा क्रिकेट संघ आज साखळी फेरीतील अखेरचा सामना इंग्लंडविरुद्ध कोलकाता येथील ईडन गार्डन्स स्टेडियममध्ये खेळणार आहे. मात्र हा सामना त्यांच्या कारकीर्दीतील न भूतो न भविष्यति असा ठरू शकतो.
भारत, दक्षिण आफ्रिका व ऑस्ट्रेलिया या देशांनी एकदिवसीय विश्‍वकरंडकाच्या उपांत्य फेरीत प्रवेश केला आहे. न्यूझीलंड चौथ्या स्थानावर विराजमान असून त्यांचाही प्रवेश जवळपास निश्‍चित आहे. यावर पाक-इंग्लंड यांच्यामधील सामन्यानंतर शिक्कामोर्तब होऊ शकतो. पाकिस्तानसमोर उपांत्य फेरीत पोहोचण्यासाठी मोठे आव्हान आहे.
प्रथम फलंदाजी केल्यानंतर त्यांना २८७ धावांनी विजय आवश्‍यक आहे. तसेच दुसऱ्यांदा फलंदाजी करत असताना त्यांना २८४ चेंडू राखून विजय मिळवणे आवश्‍यक आहे. मात्र डोंगराएवढ्या आव्हानानंतरही पाकिस्तानचा कर्णधार बाबर आझम आशावादी आहे. आम्ही नेट रनरेट सुधारण्यासाठी योजना बनवली आहे, असे त्याच्याकडून लढतीच्या पूर्वसंध्येला आयोजित करण्यात आलेल्या पत्रकार परिषदेत सांगण्यात आले.
चॅम्पियन्स करंडकाची पात्रता पणाला
इंग्लंडच्या संघाने आठ सामन्यांमधून अवघ्या दोन विजयांसह चार गुणांची कमाई केली आहे. त्यांना सहा सामन्यांमध्ये पराभवाचा सामना करावा लागला आहे. गुणतालिकेत त्यांचा संघ सातव्या स्थानावर आहे. २०२५ मध्ये पाकिस्तानात चॅम्पियन्स करंडकाचे आयोजन करण्यात येणार आहे.
या स्पर्धेमध्ये यजमान पाकिस्तानसह विश्‍वकरंडकात अव्वल असलेल्या सात देशांचा समावेश असणार आहे. त्यामुळे इंग्लंडसाठी या स्पर्धेची पात्रता पणाला लागली आहे. त्यांची घसरण झाल्यास चॅम्पियन्स करंडकापासून त्यांना दूर जावे लागणार आहे. यासाठी इंग्लंडला आज (ता. ११) विजय मिळवणे अत्यंत गरजेचे असणार आहे.
आझमकडून इंग्लंडविरुद्धच्या लढतीत योजनांबाबत खुलासा
आम्हाला या स्पर्धेचा शेवट विजयाने करावयाचा आहे. यासाठी आम्ही प्रयत्न करणार आहोत. क्रिकेटमध्ये काहीही घडू शकते. नेट रनरेट सुधारण्यासाठी आम्ही योजना आखली आहे.
पहिल्या दहा षटकांमध्ये कसे खेळायला हवे आणि त्यानंतर कशाप्रकारे खेळ करायला हवा याबाबत स्पष्टता आहे.
फखर जमान याने २० ते ३० षटके फलंदाजी केल्यास आम्ही आमचे ध्येय साध्य करू शकतो.
मोहम्मद रिझवान व इफ्तिकार अहमद या खेळाडूंचीही भूमिका या लढतीत महत्त्वाची असणार आहे.
ईडन गार्डन्सच्या खेळपट्टीचा अनुभव
पाकिस्तान-इंग्लंड यांच्यामध्ये कोलकता येथील ईडन गार्डन्स स्टेडियममध्ये सामना रंगणार आहे. येथे पाकिस्तानचा दुसरा, तर इंग्लंडचा पहिला सामना होणार आहे. याआधी पाकिस्तानने येथे झालेल्या लढतीत बांगलादेशला हरवले आहे. त्यामुळे ईडन गार्डन्सच्या संथ व फिरकी गोलंदाजीला पोषक अशा खेळपट्टीवर त्यांना खेळण्याचा अनुभव आहे. इंग्लंडच्या खेळाडूंना येथे खेळण्याचा अनुभव नसल्यामुळे आज त्यांच्यासमोर खडतर परिस्थिती निर्माण होऊ शकते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.