World Cup 20023:आयसीसी विश्वचषक २०२३ स्पर्धेत बांग्लादेश आणि इंग्लंड या संघांमध्ये मंगळवारी (दि. १० ऑक्टोबर) धर्मशाळा या ठिकाणी सामना खेळवला गेला. या सामन्यात इंग्लंडने बांग्लादेशवर १३७ धावांनी दणदणीत विजय मिळवला. इंग्लंडच्या या विजयात फलंदाज आणि गोलंदाजांनी महत्वाची भूमिका बजावली.

इंग्लंडने जोरदार फलंदाजीच्या जोरावर ३६४ धावांचा डोंगर उभा केला तर, इंग्लंडच्या भेदक गोलंदाजीसमोर बांग्लादेशच्या फलंदाजांनी नांग्या टाकल्या. १०७ चेंडूत १४० धावा ठोकणाऱ्या डेविड मलान याला सामनावीराचा पुरस्कार देण्यात आला.

बांग्लादेशने नाणेफेकीचा कौल जिंकून क्षेत्ररक्षणाचा निर्णय घेतला. मात्र, त्यांचा हा निर्णय इंग्लंडसाठी लाभदायक ठरला. इंग्लंडच्या सलामीवीरांनी बांग्लादेशच्या गोलंदाजांचा चांगलाच समाचार घेतला. पहिल्या विकेटसाठी जॉनी बेअरस्टो आणि डेविड मलान यांनी ११५ धावांची भागीदारी केली. बेअरस्टो बाद झाल्यानंतर आलेल्या जो रुटनेही वाहत्या पाण्य़ात हात धूवून घेत ८२ धावा कुटल्या.

डेविड मलानने १०७ चेंडूत १४० धावा केल्या, ज्यात त्याने ८ चौकार आणि ५ गगनचुंबी षटकारांचा वर्षाव केला. निर्धारित ५० षटकांत इंग्लंडने बांग्लादेशला विजयासाठी ३६५ धावांच आव्हान दिलं.

या आव्हानाचा पाठलाग करण्यासाठी मैदानात उतरलेल्या बांग्लादेशची सुरुवात अत्यंत खराब झाली. सलामीवीर तंझिद हसन अवघी एक धाव करुन तंबूत परतला. त्यानंतर संघाला ३ झटके लागोपाठ बसले. रीस टॉप्लीने बांगलादेशच्या फलंदाजीच कंबरडं मोडलं. मुश्फिकुर रहीमने अर्धशतक झळकावलं पण संघाला विजयापर्यंत पोहोचवण्यात तो अपयशी ठरला आणि संघ २२७ धावांवर सर्वबाद झाला. इंग्लंडच्या रीस टॉप्लीने सर्वाधिक ४ विकेट घेतल्या. (Latest Marathi News)