मुंबई : भारतीय संघाचा सलामीवीर फलंदाज लोकश राहुल यांचे भारतीय संघात पुनरागमन झाले असून झिम्बाब्वे दौऱ्यात तो भारतीय संघाचे नेतृत्व करणार आहे. भारतीय क्रिकेट नियामक मंडळाच्या वैद्यकीय पथकाने केएल राहुलची तंदुरुस्ती तपासून त्याला भारतीय संघातील समावेशाला मंजुरी दिली आहे. (BCCI clears KL Rahul for Zimbabwe tour)

भारतीय वरिष्ठ निवड समितीने राहुलला भारतीय संघाचा कर्णधार म्हणून नियुक्त केले आहे. तर शिखर धवनला उपकर्णधार म्हणून नियुक्त केले आहे.

यापूर्वी शिखर धवन झिम्बाब्वे दौऱ्यावर संघाचे नेतृत्व करणार होता. पण केएल राहुल तंदुरुस्त झाल्यामुळे धवनला उपकर्णधार बनवण्यात आले आहे. यापूर्वी 30 जुलै रोजी तीन वनडे सामन्यांच्या मालिकेसाठी भारतीय संघाची घोषणा करण्यात आली आहे. दौऱ्यासाठी विराट कोहली, ऋषभ पंत आणि जसप्रीत बुमराह या वरिष्ठ खेळाडूंना विश्रांती देण्यात आली आहे.

दरम्यान इंडियन प्रीमियर लीगमध्ये सनरायझर्स हैदराबादचे प्रतिनिधीत्व करणाऱ्या राहुल त्रिपाठीला २०२२ च्या हंगामात चांगली कामगिरी केल्यामुळे एकदिवसीय संघात समाविष्ट करण्यात आले आहे. 14 सामन्यांत त्याने 37.55 च्या सरासरीने 413 धावा केल्या. यामध्ये त्याने तीन अर्धशतके ठोकली होती.