BWF World Championship : दोन वेळची ऑलिम्पिक चॅम्पियन पीव्ही सिंधूनं जागतिक बॅडमिंटन स्पर्धेत विजयी सलामी दिली. मंगळवारी झालेल्या महिला एकेरीच्या पहिल्या फेरीतील लढतीत सिंधूनं स्लोवाकियाच्या मार्टिना रेपिस्काला 21-7, 21-9 असे एकतर्फी पराभूत करुन पुढच्या फेरीत प्रवेश मिळवला. दुसऱ्या बाजूला पुरुष गटात नवोदित लक्ष्य सेन याने जपानच्या 15 व्या मानांकित केंटा नाशिमोटो याला 22-20, 15-21, 21-18 असे पराभूत करत सर्वांचे लक्ष वेधलं.

पुरुष दुहेरीत सात्विकसाईराज रंकीरेड्डी आणि चिराग शेट्टी या भारतीय जोडगोळीनं चीनी ताइपेच्या के ली झी हुएइ आणि यांग पो सुआनयांना 43 मिनिटांच्या लढतीत 27-25, 21-15 असे पराभूत केले. जागतिक क्रमावारीत सातव्या क्रमांकावर असलेल्या सिंधूनं बिगर मानांकित प्रतिस्पर्धीचा खेळ अवघ्या 24 मिनिटात खल्लास केला. 2019 मध्ये सिंधून ही स्पर्धा गाजवली असून वर्षाच्या अखेरीस पुन्हा एकदा स्पर्धेत छाप सोडण्यासाठी सिंधू उत्सुक असेल.

रेपिस्का विरुद्धच्या सामन्यात सिंधूनं पहिला सेट 10 मिनिटाला आपल्या नावे केला. दुसऱ्या सेटमध्ये सिंधूने तीच झलक दाखवून दिली. या सेटमध्ये अवघ्या 2 मिनिटांत सिंधूनं 6-0 अशी आघाडी मिळवली. ब्रेकपर्यंत तिने 11-1 अशी मजबूत आघाडी घेतली होती.

दुसऱ्या बाजूला लक्ष्य सेन याला पहिल्या विजयासाठी चांगलाच संघर्ष करावा लागला. त्याची लढत एक तास 22 मिनटे रंगली होती. अखेर त्याने जपानच्या प्रतिस्पर्ध्याला नमवत स्पर्धेत आगेकूच केली. मिश्र दुहेरीत सौरभ शर्मा आणि अनुष्का पारिख या भारतीय जोडीला मलेशियाच्या कियान मेंग आणि लाइ पेइ जिंग जोडीनं 21-8, 21-18 असे सरळ सेटमध्ये पराभूत केले.