वॉरसॉ (पोलंड) : जागतिक बुद्धिबळ स्पर्धेत आव्हानवीर असलेल्या डी. गुकेश याने सुपरबेट जलद व ब्लिटझ् बुद्धिबळ स्पर्धेमध्ये झोकात पुनरागमन केले. पहिल्या दिवशी निराशाजनक कामगिरी केल्यानंतर गुकेशने शुक्रवारी भारताच्याच आर. प्रज्ञानंद व जर्मनीच्या विन्सेट केमर यांच्यावर दमदार विजय संपादन केले. जागतिक क्रमवारीत पहिल्या स्थानावर असलेल्या मॅग्नस कार्लसनला बरोबरीत रोखण्यातही त्याला यश मिळाले.

डी. गुकेशला पहिल्या दिवशी दोन लढतींत पराभव सहन करावा लागला होता. त्यानंतर एका लढतीत ड्रॉवर समाधान मानावे लागले होते; पण शुक्रवारी त्याने चौथ्या फेरीच्या लढतीत आर. प्रज्ञानंद याला ४१ चालींमध्ये पराभूत करताना उल्लेखनीय कामगिरी केली. गुकेश याने पुढील फेरीत केमर याच्यावर विजय साकारला. या लढतीत गुकेश याने तांत्रिकदृष्ट्या सरस खेळ केला. आता गुकेशने सहा गुणांची कमाई केली आहे.

भारताच्या डी. गुकेश याच्यासह आर. प्रज्ञानंद व अर्जुन एरीगेसी यांनीही समाधानकारक कामगिरी केली. प्रज्ञानंद याने सात गुणांची कमाई केली असून अर्जुन याने सहा गुणांची कमाई केली आहे. प्रज्ञानंद चौथ्या स्थानावर असून अर्जुन सातव्या स्थानावर आहे. पहिल्या दिवशी छान खेळ करणाऱ्या किरील शेवचेंको याची घसरण झाली आहे.

कार्लसन, वेई यी अव्वल

दिग्गज बुद्धिबळपटू मॅग्नस कार्लसन व वेई यी या दोन खेळाडूंनी प्रत्येकी आठ गुणांसह पहिले व दुसरे स्थान पटकावले आहे. शुक्रवारचा दिवस वेई यी याने गाजवला. त्याने दिवसात झालेल्या तीनही लढतींमध्ये विजय साकारला कार्लसनची बरोबरी केली.