अबुधाबी : सोमवारी ग्रुप बी मध्ये धमाकेदार सामना झाला. अफगाणिस्तानने स्कॉटलंडविरुद्ध खेळलेल्या सामन्यात तब्बल १३० धावांनी विजय मिळवला. या सामन्याचे आकर्षण होते फिरकीपटू. युवा फिरकीपटू मुजीब उर रहमान व स्टार फिरकीपटू राशीद खान या दोघांनी नऊ गडी बाद करून स्कॉटलंडची कमर तोडली. धमाकेदार विजयासह युवा फिरकीपटू मुजीब उर रहमानने विक्रम आपल्या नावावर केला.

अफगाणिस्तानने स्कॉटलंडविरुद्ध प्रथम फलंदाजी करीत चार गडी गमावून १९० धावांचे डोंगर उभारले होते. यामुळे स्कॉटलंडला चांगल्या सुरुवातची गरज होती. मात्र, त्यांची फलंदाजी चालली नाही. अवघ्या ६० धावांवर संघ बाद झाला. फिरकीपटू मुजीब उर रहमान व राशीद खान यांनी नऊ गडी बाद करून संघाला एकतर्फी विजय मिळवून दिला.

या सामन्याचा आकर्षण ठरला मुजीब उर रहमान. त्याचा हा पदार्पणाचा सामना होता. त्याने चार षटकात पाच गडी बाद करून विक्रम केला. टी-२० वर्ल्डकपच्या इतिहासात पदार्पणाच्या सामन्यात पाच विकेट घेणारा तो पहिला गोलंदाज ठरला आहे. मुजीब उर रहमान टी-२० वर्ल्डकपमध्ये पाच विकेट घेणारा अफगाणिस्तानचा सर्वांत युवा तर जगातील दुसऱ्या क्रमांकाचा युवा गोलंदाज ठरला आहे. त्याची गोलंदाजी इतकी घातक होती की स्कॉटलंडचा संघ ६० धावांवर गारद झाला.