Afghanistan vs Uganda: टी20 वर्ल्ड कप 2024 स्पर्धेतील पाचव्या सामन्यात अफगाणिस्तानने युगांडाविरुद्ध 125 धावांनी दणदणीत विजय मिळवला. गयाना येथे झालेल्या या सामन्यातील विजयासह अफगाणिस्तानच्या या स्पर्धेतील मोहिमेला सुरुवात झाली आहे.
अफगाणिस्तानच्या या विजयात मध्यमगती गोलंदाज फझलहक फारुकीने मोठे योगदान दिले. त्याच्या भेदक माऱ्यासमोर युगांडाचा संघ संघर्ष करताना दिसला. त्याने 4 षटके गोलंदाजी करताना अवघ्या 9 धावा देत 5 विकेट्स घेतल्या. त्यामुळे त्याच्या नावावर मोठा विक्रमही झाला आहे.
अफगाणिस्तानसाठी आंतरराष्ट्रीय टी20 मध्ये एका डावात सर्वोत्तम गोलंदाजी करणाऱ्या गोलंदाजांच्या यादीत तो दुसऱ्या क्रमांकावर आला आहे. या यादीत अव्वल क्रमांकावर राशिद खान असून त्याने आयर्लंडविरुद्ध 2017 साली ग्रेटर नोएडाला झालेल्या सामन्यात 3 धावात 5 विकेट्स घेतल्या होत्या.
तसेच पुरुषांच्या टी20 वर्ल्ड कपमध्ये एका डावात सर्वोत्तम गोलंदाजी करणाऱ्या गोलंदाजांच्या यादीतही 23 वर्षीय फझलहक चौथ्या क्रमांकावर आला आहे. या यादीत अ्वल क्रमांकावर अजंता मेंडिस आहे. त्याने झिम्बाब्वेविरुद्ध 2012 मध्ये 8 धावांत 6 विकेट्स घेतल्या होत्या.
6 विकेट्स/8 धावा - अजंता मेंडिस (श्रीलंका विरुद्ध झिम्बाब्वे, 2012)
5 विकेट्स /3 धावा - रंगना हेराथ (श्रीलंका विरुद्ध न्युझीलंड, 2014)
5 विकेट्स /6 धावा - उमर गुल (पाकिस्तान विरुद्ध न्युझीलंड, 2009)
5 विकेट्स /9 धावा- फझलहक फारुकी (अफगाणिस्तान विरुद्ध युगांडा, 2024)
5 विकेट्स /10 धावा - सॅम करन (इंग्लंड विरुद्ध अफगाणिस्तान, 2022)
सामन्याबद्दल सांगायचे झाले, तर अफगाणिस्तानने प्रथम फलंदाजी करताना 20 षटकात 5 बाद 183 धावा केल्या होत्या. त्यानंतर 184 धावांच्या लक्ष्याचा पाठलाग करताना युगांडाचा संघ 16 षटकात 58 धावांवर सर्वबाद झाला होता.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.