IND vs AFG, T20 World Cup: भारतीय संघाने अफगाणिस्तानवर मोठा विजय मिळवत स्पर्धेतील आपले आव्हान जिवंत ठेवले. सलामीवीर रोहित शर्मा (७४) आणि लोकेश राहुल (६९) यांच्या अर्धशतकांच्या जोरावर १४० धावांची सलामी दिली. त्यानंतर हार्दिक पांड्या (३५*) आणि ऋषभ पंत (२७*) यांच्यात नाबाद ६३ धावांच्या भागीदारीच्या बळावर भारताने २१० धावांपर्यंत मजल मारली. हे लक्ष्य अफगाणिस्तानला पेलले नाही. करीम जनतच्या नाबाद ४२ धावा आणि कर्णधार मोहम्मद नाबीच्या ३५ धावांच्या खेळीमुळे अफगाणिस्तानने २० षटकात ७ बाद १४४ धावांपर्यंतच मजल मारली. या सामन्यानंतर भारतीय चाहते खुश असताना एक वेगळीच चर्चा रंगल्याचे दिसून आली.

अफगाणिस्तानच्या संघाने मुद्दाम भारताविरूद्ध मोठा पराभव पदरी पाडून घेतला असा दावा काही ट्वीटर युजर्सनी केला. भारतीय संघासोबतची अफगाणिस्तानची मॅच फिक्स होती असाही काही लोकांनी आरोप केला. पाहा त्या संबंधीचे काही ट्वीट्स...

दरम्यान, भारताने अफगाणिस्तान विरूद्धच्या विजयानंतर आपले स्पर्धेतील आव्हान जिवंत ठेवले. भारतीय संघाचे आता पुढील दोन सामने तुलनेने कमकुवत असणाऱ्या नामिबिया आणि स्कॉटलंडशी होणार आहेत.