Ritika Sajdeh Post for Rohit Sharma: रोहित शर्माच्या नेतृत्वाखाली भारताने 2024 च्या T20 विश्वचषकात जबरदस्त खेळ केला. रोमहर्षक फायनलमध्ये दक्षिण आफ्रिकेचा पराभव करून भारताने ट्रॉफीवर कब्जा केला. रोहित ब्रिगेडने 2023 मध्ये आयसीसी वर्ल्ड टेस्ट चॅम्पियनशिप आणि एकदिवसीय विश्वचषक जिंकण्याची संधी गमावली होती.

टी20 विश्वचषक जिंकल्याने अखेर भारताची ICC ट्रॉफीची प्रतिक्षा संपली. मात्र यानंतर रोहितने टी20 आंतरराष्ट्रीय क्रिकेटमधून निवृत्तीची घोषणा केली. रोहितने ट्रॉफी जिंकल्याने पत्नी रितिका सजदेह खूश आहे, पण T20I मधून निवृत्ती घेतल्याने दुःखी आहे. तिने एक भावनिक पोस्ट शेअर केली आहे, जी वेगाने व्हायरल होत आहे.

रितिकाने सोमवारी इंस्टाग्रामवर पोस्ट मध्ये लिहिले की , "रो, मला माहित आहे की हे तुझ्यासाठी किती महत्त्वाचे आहे. हा फॉरमॅट, ही ट्रॉफी, हे लोक, हा प्रवास आणि तू ज्याचे स्वप्न पाहिले आहे ते साध्य करण्याची संपूर्ण प्रक्रिया."

"मला माहित आहे की गेले काही महिने किती कठीण होते. तुझ्या हृदयावर, मनावर आणि शरीरावर किती परिणाम झाला आहे, हे मला माहीत आहे, पण तुला तुझे स्वप्न पूर्ण करताना पाहणे हे खूप भावनिक आणि प्रेरणादायी होते."

रितिका म्हणाली की रोहितला आंतरराष्ट्रीय टी-20 सोडताना पाहणे सोपे नाही. रितिकाने पुढे लिहिले की, 'तू जे काही साध्य केलेस, तुझा हा खेळ आणि तुझ्या चाहत्यांचे प्रेम पाहुन, तुझी पत्नी आहे याचा मला खूप अभिमान आहे. पण तुझ्या खेळावर प्रेम करणारी व्यक्ती म्हणून मला वाईट वाटत आहे."

"मला माहित आहे की तू याबद्दल खूप विचार केला आहे, परंतु तुला टी२० क्रिकेट सोडताना पाहणे सोपे नाही, माझे तुझ्यावर खूप प्रेम आहे आणि तुला माझा म्हणवून घेण्यात खूप अभिमान आहे.' रितिकाने हार्ट इमोजीही टाकला आहे.

भारताने 11 वर्षांनंतर आयसीसी ट्रॉफी, 13 वर्षांनंतर विश्वचषक आणि 17 वर्षांनंतर टी-20 विश्वचषक जिंकले आहे. फायनलनंतर झालेल्या पत्रकार परिषदेत रोहित म्हणाला, 'हा माझा शेवटचा सामना होता.'

'निरोप घेण्याची हीच योग्य वेळ आहे. मला कोणत्याही किंमतीत ट्रॉफी जिंकायची होती. मला जे हवे होते आणि तेच घडले. मी माझ्या आयुष्यात या क्षणासाठी खूप आतुर होतो. आनंद आहे यावेळी जिंकू शकलो.'

रोहितने टी20 आंतरराष्ट्रीय क्रिकेटमध्ये 159 सामन्यांमध्ये 4231 धावा केल्या, ज्यात 5 शतके आणि 32 अर्धशतकांचा समावेश आहे. तो कसोटी आणि एकदिवसीय क्रिकेट खेळत राहणार आहे.