T20 World Cup 2021 India Vs Pakistan: टी -20 वर्ल्ड कप स्पर्धेत विराट कोहलीच्या नेतृत्वाखालील टीम इंडियाची सलामीची लढत पाकिस्तान विरुद्ध होणार आहे. हायहोल्टेज सामन्यापूर्वी क्रिकेट वर्तुळात चर्चेचं वातावरण चांगलेच तापले आहे. या सामन्याच्या पार्श्वभूमीवर पाकिस्तानचा माजी जलदगती गोलंदाज शोएब अख्तर आणि भारताचा माजी क्रिकेटर मोहम्मद कैफ एका वृत्त वाहिनीवरील खास कार्यक्रमात सहभागी झाले होते. या कार्यक्रमात रावळपिंडी एक्स्प्रेस शोएब अख्तरने सचिन तेंडुलकरवर स्तुती सुमनांचा अक्षरश: वर्षाव केल्याचे पाहायला मिळाले.

सध्याच्या घडीला क्रिकेट जगतात सचिन तेंडुलकरच्या नावे सर्वाधिक धावा आहेत. त्याचा हा विक्रम विराट कोहली मागे टाकेल, अशी चर्चाही रंगते. मात्र शोएब अख्तरने सचिन सर्वकालीन महान खेळाडू असल्याचे म्हटले आहे. 2016 मध्ये मास्टर ब्लास्टर सचिन तेंडुलकरची ग्रेट भेट झाल्याचा दावाही त्याने यावेळी केला.

सचिनने स्वत:च्या हाताने जेवण करुन मला खाऊ घातले होते. त्याच्यासारखा फलंदाज होणं नाही, असे अख्तर यावेळी म्हणाला. यावेळी त्याने गुवाहटीमध्ये आपल्या चेंडूवर सचिन फॅक्चर होऊनही खेळल्याचा किस्साही शेअर केला. सचिन तेंडुलकर मला घाबरायचा, असे मी कधीही म्हटलेलो नाही. सचिन जर आजच्या घडीला खेळत असता तर त्याने लाखभर धावा केल्या असत्या, असे मोठे विधानही अख्तरने केले.

शेन वॉर्न, मेग्रा, वसिम आक्रम आणि वकार युनिस या दिग्गज गोलंदाजांचा सचिनने सामना केला आहे. दहा वर्षानंतर त्याने ब्रेटली आणि माझ्या गोलंदाजीही खेळली. ही गोष्ट सचिनच्यातील क्षमता सिद्ध करणारी आहे, असे अख्तरने म्हटले आहे. सचिनसोबतच अख्तरने हिटमॅन रोहित शर्माचेही कौतुक केले आहे.