T20 World Cup 2024, India vs England: टी20 वर्ल्ड कप 2024 स्पर्धेतील उपांत्य फेरीतील दुसरा सामना भारत आणि इंग्लंड संघात खेळवला जाणार आहे. हा सामना गयानामधील प्रोव्हिडन्स स्टेडियमवर खेळवला जाणार असून भारतीय प्रमाणवेळेनुसार गुरुवारी (27 जून) रात्री 8 वाजता हा सामना सुरू होणार आहे.

भारत आणि इंग्लंड हे संघ सलग दुसऱ्यांदा टी20 वर्ल्ड कपच्या उपांत्य फेरीत लढणार आहेत. यापूर्वी 2022 साली झालेल्या टी20 वर्ल्ड कपच्या उपांत्य फेरीतही भारत आणि इंग्लंड संघात उपांत्य सामना झाला होता, त्यावेळी इंग्लंडने विजय मिळवला होता.

दरम्यान, भारत आणि इंग्लंड संघात आत्तापर्यंत 23 टी20 सामने खेळवण्यात आले आहेत. यातील भारताने 12 सामने जिंकले आहेत, तर इंग्लंडने 11 सामने जिंकले आहेत. तसेच भारत आणि इंग्लंड संघात टी20 वर्ल्ड कपमध्ये आत्तापर्यंत 4 सामने खेळवण्यात आले आहेत. त्यात 2 सामने भारताने जिंकले आहेत, तर 2 सामने इंग्लंडने जिंकले आहेत.

एकूणच ही आकडेवारी पाहिली, तर दोन्ही संघांनी एकमेकांनी तोडीस तोड उत्तर दिल्याचे दिसून येत आहे. त्यामुळे आता गुरुवारी या दोन संघांपैकी कोणता संघ विजय मिळवत अंतिम सामन्यात प्रवेश करणार हे पाहाणे रंजक ठरणार आहे.

हे माहित आहे का?

टी20 वर्ल्ड कप 2024 स्पर्धेत भारताचा कर्णधार रोहित शर्मा आणि इंग्लंडचा कर्णधार जॉस बटलर यांनी आत्तापर्यंत सारख्याच धावा केल्या आहेत. रोहितने 6 सामन्यांत 120 चेंडूंचा सामना करताना 191 धावा केल्या आहेत. त्याचा 159.16 स्ट्राईक रेट आहे. बटलरनेही 7 सामन्यांत 120 चेंडूंचा सामना करतानाच 191 धावा केल्या आहे, तर त्याचाही स्ट्राईक रेट 159.16 आहे.