Anshuman Gaekwad's Cancer Treatment : भारताचा माजी क्रिकेटपटू आणि टीम इंडियाचा प्रशिक्षक अंशुमन गायकवाड हे ब्लड कॅन्सरशी झुंज देत आहे. त्यामुळे भारताला 1983 चा वर्ल्ड कप जिंकून देणारा अनुभवी अष्टपैलू आणि कर्णधार कपिल देव यांनी बीसीसीआयकडे माजी भारतीय क्रिकेटपटू अंशुमन गायकवाड यांना आर्थिक मदत करण्याची विनंती केली होती.

कपिल देव यांनी अंशुमन गायकवाड यांच्या मदतीसाठी त्यांची पेन्शन दान करण्याचा निर्णय घेतला होता. मोहिंदर अमरनाथ, संदीप पाटील, मदन लाल आणि कीर्ती आझाद यांनीही आपल्या सहकारी खेळाडूंना मदतीचा हात पुढे केला.

गायकवाड हे लंडनमध्ये होते, पण आता ते बडोद्यात परतले आहेत, जिथे त्यांच्यावर उपचार सुरू आहेत. दरम्यान, अंशुमन गायकवाड याच्या मदतीसाठी भारतीय क्रिकेट नियामक मंडळाने (BCCI) मदतीचा हात पुढे केला आहे.

बीसीसीआय सचिव जय शाह यांनी कॅन्सरशी झुंज देत असलेला भारताचा दिग्गज क्रिकेटपटू अंशुमन गायकवाड यांना आर्थिक सहाय्य देण्यासाठी तातडीने 1 कोटी रुपये देण्याची सूचना दिल्या आहेत. जय शाह यांनी गायकवाड यांच्या कुटुंबाशीही बोलून परिस्थितीचा आढावा घेतला आणि मदत केली. बीसीसीआयच्या सर्वोच्च परिषदेने ही माहिती दिली.

बीसीसीआयने आश्वासन दिले आहे की ते गायकवाड यांच्या उपचारादरम्यान त्यांच्या प्रकृतीवर बारकाईने लक्ष ठेवतील. या कठीण प्रसंगी क्रिकेट बोर्डाने माजी खेळाडू आणि त्याच्या कुटुंबीयांना पाठिंबा दर्शवला आहे.

अंशुमन गायकवाड यांची कारकीर्द

अंशुमन गायकवाडने 1974 ते 1985 दरम्यान 40 कसोटींच्या 70 डावांमध्ये 30.07 च्या सरासरीने 1985 धावा केल्या. यामध्ये 2 शतके आणि 10 अर्धशतकांचा समावेश आहे. 15 एकदिवसीय सामन्यांच्या 14 डावात 20.69 च्या सरासरीने 269 धावा केल्या. यामध्ये एका अर्धशतकाचा समावेश आहे.