Suryakumar Yadav : शनिवारी भारताचा नवा टी-20 कर्णधार म्हणून आपल्या प्रवासाची विजयी सुरुवात करणाऱ्या सूर्यकुमार यादवच्या नेतृत्वाखाली संघाने पहिल्या टी-20 सामन्यात श्रीलंकेचा 43 धावांनी पराभव केला. हा एक हाय स्कोअरिंग सामना होता, ज्यामध्ये लक्ष्याचा पाठलाग करताना श्रीलंका सहज जिंकेल असे एकेकाळी वाटत होते. मात्र, भारतीय गोलंदाजांनी टीम इंडियाला सामना जिंकून दिला. पण सामन्यादरम्यान कर्णधार सूर्यकुमार यादवला एका गोष्टीची भीती वाटत होती, त्याने सामना संपल्यानंतर याबाबत खुलासा केला.

या सामन्यात टीम इंडियाने प्रथम फलंदाजी करताना 20 षटकात 213/7 धावा केल्या. प्रत्युत्तरात श्रीलंकेचा डाव 170 धावांवर आटोपला. एका वेळी लक्ष्याचा पाठलाग करताना श्रीलंकेची धावसंख्या 140/1 होती, त्यानंतर टीम इंडियाने सामना फिरवला.

सामन्यानंतर बोलताना भारतीय कर्णधार सूर्यकुमार यादव म्हणाला की, "श्रीलंका पहिल्याच चेंडूपासून शानदार क्रिकेट खेळत होते आणि याचे श्रेय त्यांना जाते. रात्री विकेट कशी खेळते हे आम्हाला माहीत आहे. पण आम्ही भाग्यवान होतो की दव नव्हते. वर्ल्ड कपमध्ये ज्या प्रकारे आम्ही खेळलो त्यामुळे आम्हाला आठवण झाली की सामना अजून लांब आहे.

कर्णधार सूर्यकुमार यादवने भारतासाठी सर्वात मोठी खेळी खेळली, त्याने 26 चेंडूत 8 चौकार आणि 2 षटकारांच्या मदतीने 58 धावा केल्या, ज्यामध्ये त्याचा स्ट्राइक रेट 223.08 होता. याशिवाय यष्टीरक्षक फलंदाज ऋषभ पंतने 33 चेंडूंत 6 चौकार आणि 1 षटकाराच्या मदतीने 49 धावा केल्या. सलामीला आलेल्या यशस्वी जैस्वालने संघाला वेगवान सुरुवात करून दिली. या दोघांनी पहिल्या विकेटसाठी 36 चेंडूत 74 धावांची भागीदारी केली होती.