India vs Bangladesh T20I: भारतीय क्रिकेट संघाचा २२ वर्षीय युवा वेगवान गोलंदाज मयंक यादव याने पहिल्याच आंतरराष्ट्रीय लढतीत ठसा उमटवला. त्याने रविवारी (६ ऑक्टोबर) बांगलादेशविरुद्ध झालेल्या टी२० लढतीत २१ धावा देत एक फलंदाज बाद केला, तसेच एक षटक निर्धाव टाकले.

याप्रसंगी लढत संपल्यानंतर या पठ्ठ्याने आपले मत व्यक्त करताना म्हटले की, माझ्या गोलंदाजीत वेग आहे. हे मला माहीत आहे, पण आयपीएलच्या दरम्यान मला समजले की सातत्यपूर्ण कामगिरीही महत्त्वाची आहे. त्यानंतरच आंतरराष्ट्रीय स्तरावर यश मिळवता येते.

मयंक यादव पुढे म्हणाला, चेंडूचा टप्पा व दिशा याचे क्रिकेटमध्ये अनन्यसाधारण महत्त्व आहे. वेगासह चेंडूचा टप्पा व दिशा योग्य असल्यास यश मिळवता येते. प्रतिस्पर्धी संघातील फलंदाजांकडूनही आदर मिळतो. त्यामुळे गेल्या काही दिवसांमध्ये मी चेंडूचा टप्पा व दिशा यावर प्रचंड मेहनत केली.

‘आयपीएल’नंतर दुखापतीमुळे क्रिकेटपासून दूर होतो. आता माझी भारतीय संघामध्ये निवड झाली. मी उत्साही होतो, पण चिंताही वाढली होती. कारण, तीन ते चार महिन्यांनंतर स्पर्धात्मक क्रिकेटमध्ये पुनरागमन केले होते, असे तो पुढे नमूद करतो.

खेळपट्टीनुसार गोलंदाजीत बदल

खेळपट्टीनुसार गोलंदाजीत बदल करतो, असे मयंक यादव या वेळी म्हणाला. तो नमूद करतो की, ‘आयपीएल’मध्ये वेगवान चेंडूवर भर दिला. कारण, त्या वेळी हळुवार चेंडू टाकण्याची गरज नव्हती, पण ग्वाल्हेरच्या खेळपट्टीवर चेंडूंना उसळी मिळत नव्हती. त्यामुळे काही चेंडूंमध्ये बदल करावे लागले.