Big Blow for Team India before match against Sri Lanka - भारत-श्रीलंका यांच्यातल्या ट्वेंटी-२० मालिकेला २७ जुलैपासून सुरूवात होत आहे. पण, त्यापूर्वी टीम इंडियाला मोठा धक्का बसण्याची शक्यता निर्माण झाली आहे. पहिल्या ट्वेंटी-२०साठी भारतीय संघाचे सराव सत्र गुरुवारी पार पडले आणि यात प्रमुख खेळाडूला दुखापत झाल्याचे पाहायला मिळाले. गौतम गंभीरच्या ( Gautam Gambhir) मार्गदर्शनाखालील पहिल्याच दौऱ्याला सुरूवात होण्यापूर्वीच टीम इंडियाची चिंता वाढली आहे.

भारतीय संघ २२ जुलैला कोलंबोत दाखल झाला आणि सरावालाही सुरूवात केली. गुरुवारी झालेल्या सराव सत्रात सारे सुरळीत सुरू असल्याचे दिसत असताना माशी शिंकली. भारताच्या ट्वेंटी-२० संघातील सर्वात अनुभवी गोलंदाज मोहम्मद सिराज ( Mohammed Siraj) याच्या पायाला चेंडू लागला आणि त्याला त्वरित उपचार घ्यावे लागले. त्यामुळे श्रीलंकेविरुद्धच्या पहिल्या सामन्यात त्याच्या खेळण्याची शक्यता कमी वाटत आहे.

सिराजच्या गैरहजेरीत दोन पर्याय..

मोहम्मद सिराज पहिल्या सामन्यात न खेळल्यास भारताकडे अर्शदीप सिंग व खलिल अहमद हे दोन नियमित जलदगती गोलंदाजांचे पर्याय आहेत. शिवाय संघात हार्दिक पांड्या व शिवम दुबे हे जलदगती गोलंदाज अष्टपैलू खेळाडू संघात असल्याने टीम इंडियाला फार चिंता करण्याचं कारण नाही.

श्रीलंकेला दोन धक्के...

भारताविरुद्धच्या ट्वेंटी-२० मालिकेत यजमान श्रीलंकेला दोन धक्के बसले आहेत. या मालिकेतून माघार घेणारा नुवान तुषारा हा श्रीलंकेचा दुसरा जलदगती गोलंदाज ठरला. बुधवारी दुश्मंथा चमिराने आजारपणामुळे माघार घेतली आणि त्याच्याजागी असिथा फर्नांडोची निवड केली गेली. नुवानच्या रिप्लेसमेंटची घोषणा अद्याप झालेली नसली, तरी डावखुरा गोलंदाज दिलशान मदुशंका याला संधी मिळण्याची शक्यता आहे.

भारताचा ट्वेंटी-२० संघ - सूर्यकुमार यादव ( कर्णधार), शुभमन गिल ( उप कर्णधार), यशस्वी जैस्वाल, रिंकू सिंग, रियान पराग, ऋषभ पंत, संजू सॅमसन, हार्दिक पांड्या, शिवम दुबे, अक्षर पटेल, वॉशिंग्टन सुंदर, रवी बिश्नोई, अर्शदीप सिंग, खलिल अहमद, मोहम्मद सिराज.