India vs Sri Lanka ODI Series: ट्वेंटी-२० वर्ल्ड कप स्पर्धेनंतर विश्रांतीवर असलेले भारतीय खेळाडू राष्ट्रीय कर्तव्यावर पोहोचले आहेत. कर्णधार रोहित शर्मा हा आगामी ३ वन डे सामन्यांच्या मालिकेसाठी अमेरिकेतून श्रीलंकेत दाखल झाला आहे. त्याच्यासह वन डे मालिकेसाठी संघात निवड झालेले खेळाडूही येथील आयटीसी रत्तनदीपा हॉटेलमध्ये थांबले आहेत. यामध्ये विराट कोहली, श्रेयस अय्यर, कुलदीप यादव आणि हर्षित राणा यांचा समावेश आहे.

सूर्यकुमार यादवच्या नेतृत्वाखाली भारतीय संघाने श्रीलंकेविरुद्धच्या ट्वेंटी-२० मालिकेत २-० अशी विजयी आघाडी घेतली आहे. त्यानंतर वन डे मालिका होणार आहे आणि रोहितसह सर्व खेळाडूंनी सोमवारी नेट सेशनमध्ये सहभाग घेतला. भारतीय संघाचा सहाय्यक प्रशिक्षक अभिषेक नायर हा या सराव सत्रात खेळाडूंसोबत दिसला. वन डे संघातील अन्य खेळाडू लवकरच श्रीलंकेत दाखत होतील. ३० जुलैला तिसरी आणि शेवटची ट्वेंटी-२० मॅच होणार आहे.

दरम्यान, मोर्ने मॉर्केल ( Morne Morkel ) गंभीरच्या नेतृत्वाखाली गोलंदाजी प्रशिक्षक म्हणून कोचिंग स्टाफमध्ये सामील होण्याची अपेक्षा आहे. त्याचा संघातील सहभाग सप्टेंबरमध्ये सुरू होणाऱ्या बांगलादेशविरुद्धच्या घरच्या मालिकेपासून अपेक्षित आहे. संघात मुख्य प्रशिक्षकासह दोन सहाय्यक प्रशिक्षक (अभिषेक नायर आणि रायन टेन डोशेट), एक गोलंदाजी प्रशिक्षक (मॉर्केल), क्षेत्ररक्षण प्रशिक्षक (टी दिलीप), आणि फिरकी गोलंदाजी प्रशिक्षक यांचा समावेश असेल.

वन डे मालिका कोलंबोमध्ये २ ऑगस्टपासून सुरू होत असून तिन्ही सामने आर प्रेमदासा आंतरराष्ट्रीय क्रिकेट स्टेडियमवर खेळवले जातील. ४ आणि ७ ऑगस्टला दुसरी व तिसरी वन डे होईल.

भारताचा वन डे संघ: रोहित शर्मा (कर्णधार), शुभमन गिल, विराट कोहली, केएल राहुल, ऋषभ पंत, श्रेयस अय्यर, शिवम दुबे, कुलदीप यादव, मोहम्मद सिराज, वॉशिंग्टन सुंदर, अर्शदीप सिंग, रियान पराग , अक्षर पटेल, खलील अहमद, हर्षित राणा.