Ranji Trophy 2024 News: भारतात सध्या रणजी ट्रॉफीच्या नव्या हंगामाला दणक्यात सुरुवात झाली आहे. या स्पर्धेतील पहिल्या फेरीत बंगाल संघाचा सामना उत्तर प्रदेशविरुद्ध झाला आहे. या सामन्यात बंगालसाठी २९ वर्षीय अभिमन्यू ईश्वरने शानदार कामगिरी करत शतक झळकावले आहे.
दुसऱ्या डावात बंगालसाठी अभिमन्यूने १७२ चेंडूत १२ चौकारांसह नाबाद १२७ धावांची खेळी केली. हे त्याचे प्रथम श्रेणी क्रिकेटमधील २७ वे शतक आहे. तसेच सलग चौथ्या प्रथम श्रेणी सामन्यात त्याने शतक केले आहे.
त्याने यापूर्वी दुलीप ट्रॉफीमध्ये इंडिया बी संघाचे नेतृत्व करताना इंडिया सी विरुद्ध आणि इंडिया डी विरुद्ध शतक केले होते. तसेच त्याने इराणी कप स्पर्धेत शेष भारत संघाकडून १९१ धावांची खेळी केली होती. आता त्याने रणजी ट्रॉफीच्या पहिल्याच सामन्यात शतक केले आहे.
दरम्यान, अभिमन्यू सातत्याने शानदार कामगिरी करत आहे. असे असताना त्याला न्यूझीलंडविरुद्ध १६ ऑक्टोबरपासून सुरू होणाऱ्या कसोटी मालिकेसाठी भारतीय संघात तिसरा सलामीवीर म्हणून संधी मिळेल, अशी चर्चा होती. मात्र त्याला संधी मिळाली नाही.
आता त्याने रणजी ट्रॉफीच्या पहिल्या सामन्यातही शतक करत पुन्हा एकदा आगामी ऑस्ट्रेलिया दौऱ्यासाठी दावेदारी ठोकली आहे. सध्या अभिमन्यूची स्पर्धा कसोटी संघात तिसरा सलमीवीराच्या जागेसाठी ऋतुराज गायकवाडबरोबर आहे.
ऋतुराजनेही महाराष्ट्राचे नेतृत्व करताना रणजी ट्रॉफीच्या पहिल्या सामन्यात जम्मू-काश्मीरविरुद्ध ८६ धावांची खेळी केली आहे. त्यामुळे आता ऑस्ट्रेलिया दौऱ्यासाठी तरी अभिमन्यू किंवा ऋतुराज यांना संधी मिळणार का हे पाहावे लागणार आहे. ऋतुराजला देखील न्यूझीलंडविरुद्धच्या कसोटी मालिकेसाठी निवडण्यात आलेले नाही.
दरम्यान, बंगालने उत्तर प्रदेशविरुद्ध पहिल्या डावात सर्वबाद ३११ धावा केल्या होत्या. पहिल्या डावात सुदीप चॅटर्जीने ११६ धावा केल्या, तर सुदीप घरामीने ९० धावा ठोकल्या. पहिल्या डावात अभिमन्यू ५ धावांवर बाद झाला होता. उत्तर प्रदेशकडून यश दयाल आणि विपराज निगम यांनी प्रत्येकी ४ विकेट्स घेतल्या.
त्यानंतर उत्तर प्रदेशचा दुसरा डाव ८९.४ षटकात २९२ धावांवर संपुष्टात आला. त्यामुळे बंगालला १९ धावांची आघाडी मिळाली. उत्तर प्रदेशकडून पहिल्या डावात आर्यन जुयालने ९२ धावांची खेळी, तर सिद्धार्थ यादवने ७३ धावांची खेळी केली. बंगालकडून या डावात मुकेश कुमार आणि शाहबाज यांनी प्रत्येकी ४ विकेट्स घेतल्या.
यानंतर बंगालने दुसरा डाव अभिमन्यूच्या शतकाच्या जोरावर ३ बाद २५४ धावांवर घोषित केला आणि १९ धावांच्या आघाडीसह उत्तर प्रदेशसमोर २७४ धावांचे लक्ष्य ठेवले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.