न्यूयॉर्क : मृत्यूच्या दाढेतून तू परत आला आहेस. त्यामुळे मैदानावर कितीही आव्हानात्मक परिस्थिती असली तरी तू त्यावर मात करणार याची खात्री आहे. तू शूरवीर आहेस, अशा शब्दात भारतीय संघाचे माजी प्रशिक्षक रवी शास्त्री यांनी पंतचे कौतुक केले.

सामन्यात सर्वोत्तम क्षेत्ररक्षण करणाऱ्या खेळाडूचा मेडल देऊन गौरव करण्याची प्रथा एकदिवसीय विश्वकरंडक स्पर्धेपासून सुरू झाली आहे. रविवारी पाकविरुद्धच्या सामन्यात पंतने चपळाईपूर्ण खेळाने तीन झेल पकडले. त्यामुळे तो सर्वोत्तम खेळाडू ठरला. शास्त्री यांच्या हस्ते त्याला मेडल देण्यात आले.

यावेळी बोलताना शास्त्री यांनी रिषभ पंतच्या गाडीला झालेल्या अपघातापासून ते त्याने मोठ्या धैर्याने आणि लढाऊ बाणा दाखवत केलेल्या पुनरागमनाच्या आठवणी शब्दबद्ध केल्या. तुझ्या अपघाताचे वृत्त ऐकताच माझ्या डोळ्यात पाणी आले होते, त्यानंतर तुला रुग्णालयात पाहिले तेव्हा मी अवाकच झालो होतो. तुझ्यासाठी पुनरागमन अशक्य असल्याचे मला वाटत होते, परंतु सर्व प्रतिकूल परिस्थितीवर मात करून केलेले पुनरागमन विचाराच्या पलीकडचे आहे, असे शास्त्री म्हणाले.

तुजे यष्टीरक्षणच अक्षेद्य होते असे नाही, तर दाखवलेली चपळता अवर्णनीय होती. फलंदाजीत तुझ्याकडे एक्स फॅक्टर आहे. हे सर्व पाहून तू किती मेहनत घेतली असशील याची जाणीव होते, असे शास्त्री यांनी सांगितले.