Women's T20 World Cup 2024 Harmanpreet Kaur Captaincy: भारतीय महिला क्रिकेट संघाला नवीन कर्णधाराची गरज आहे का, या प्रश्नाचा शोध आता सुरू झाला आहे. दुबईत सुरू असलेल्या महिला ट्वेंटी-२० वर्ल्ड कप स्पर्धेत भारतीय संघ जेतेपदाचा प्रबळ दावेदार होता, परंतु हरमनप्रीत कौरच्या नेतृत्वाखाली खेळणाऱ्या संघाला साखळी फेरीतूनच माघारी परतावे लागले. भारतीय संघाने चारपैकी २ सामने जिंकले, परंतु न्यूझीलंडने त्यांना मागे टाकून उपांत्य फेरीचे तिकिट पटकावले. या स्पर्धेत भारतीय संघाची कामगिरी अत्यंत निराशाजनक झाली आणि त्यामुळेच BCCI मोठा निर्णय घेण्याच्या तयारीत आहेत.

मागील ८ वर्षांत भारतीय महिला संघ प्रथमच वर्ल्ड कप स्पर्धेच्या साखळी फेरीतच बाहेर पडला. त्यामुळे आता कर्णधार बदलाची वेळ आली आहे का, याचा विचार सुरू झाला आहे. BCCI लवकरच बैठक बोलावणार आहे आणि हरमनप्रीत कौरचे कर्णधारपद जाण्याची शक्यता अधिक आहे. बीसीसीआय, निवड समिती आणि मुख्य प्रशिक्षक अमोल मुझुमदार यांच्यात लवकरच बैठक होईल आणि त्यात हरमनप्रीतच्या नेतृत्वावर चर्चा केली जाणार आहे.

भारतीय संघ आता न्यूझीलंडविरुद्ध तीन वन डे सामन्यांची मालिका खेळणार आहे. २४ ऑक्टोबरपासून सुरू होणाऱ्या या मालिकेसाठी संघ निवडीबाबतची बैठक होणार आहे आणि त्यातच हरमनप्रीत कौरच्या नेतृत्वाचा निर्णय घेतला जाईल. २०१६ मध्ये हरमनप्रीतने ट्वेंटी-२० संघाच्या नेतृत्वाची जबाबदारी घेतली होती. तिच्या नेतृत्वाखाली भारतीय संघाने २०२०च्या वर्ल्ड कपमध्ये बाद फेरीत प्रवेश केला होता, परंतु यंदाच्या पर्वात ते साखळी फेरीत पराभूत झाले. नेतृत्व जाणार असले तरी हरमनप्रीतचे संघातील स्थान कायम राहील.

''महिला संघाला नवीन कर्णधाराची गरज आहे का, यावर बीसीसीआय चर्चा करणार आहे. भारतीय क्रिकेट बोर्डाने महिला संघाला जे हवं ते दिलं आणि आता संघाच्या कर्णधारपदी नवीन चेहरा बसवण्याची हिच योग्य वेळ आहे. हरमनप्रीत ही संघाची प्रमुख खेळाडू असेल, परंतु आता बदलाची वेळ आली आहे,''असे सूत्रांनी सांगितले.पुढील वन डे वर्ल्ड कप भारतात होणार आहे आणि त्यासाठीची तयारी न्यूझीलंडविरुद्धच्या मालिकेतून सुरुवात होणार आहे.