सिडनी - दोन दिवसांनंतर आपला अखेरचा कसोटी सामना खेळणारा ऑस्ट्रेलियाचा सलामीवीर डेव्हिड वॉर्नरने एकदिवसीय क्रिकेटमधूनही निवृत्ती जाहीर केली आहे, परंतु संघाला गरज भासली तर पुढील वर्षी होणाऱ्या चॅम्पियन्स करंडक स्पर्धेसाठी आपण उपलब्ध असू असे सांगत त्याने दरवाजे उघडे ठेवले आहेत.

३७ वर्षीय वॉर्नर ट्वेन्टी-२० प्रकारात मात्र खेळत रहाणार आहे. बुधवारपासून आपले घरचे मैदान असलेल्या सिडनीत पाकिस्तानविरुद्ध होणारा कसोटी सामना आपला अखेरचा कसोटी सामना असणार हे वॉर्नरने अगोदरच जाहीर केलेले आहे.

अहमदाबादमध्ये भारताविरुद्ध झालेला एकदिवसीय विश्वकरंडक स्पर्धेतला अंतिम सामना हा आपला अखेरचा एकदिवसीय सामना असल्याचे त्याने म्हटले आहे. या प्रकारातून मी निश्चितच निवृत्त होत आहे, असे सांगत त्याने भारतातील विजेतेपद हे सर्वात मोठे असल्याचे नमूद केले.

परदेशातील लीग खेळण्यास आपण आता मुक्त आहोत, असे सांगणाऱ्या वॉर्नरची दुबईतील आंतरराष्ट्रीय लीगमध्ये दिल्ली फ्रँचाईसच्या दुबई कॅपिटल संघाच्या कर्णधारपदी नियुक्ती करण्यात आली.

विश्‍वविजेत्या संघातील सदस्य

ऑस्ट्रेलियाचा सर्वात धडाकेबाज सलामीवीर म्हणून लौकिक मिळवणाऱ्या वॉर्नर ऑस्ट्रेलियाच्या दोन विश्वकरंडक विजेत्या संघातील खेळाडू होता. भारतात झालेल्या विश्वकरंडक स्पर्धेतऑस्ट्रेलियाकडून तो सर्वाधिक धावा करणारा फलंदाज ठरला होता.

एकदिवसीय प्रकारातून मी निवृत्त होत आहे त्यामुळे मला जगभरातील व्यावसायिक ट्वेन्टी-२० लीगमध्ये मुक्तपणे खेळता येईल. पुढील वर्षी चॅम्पियन्स करंडक स्पर्धा आहे तोपर्यंत मी चांगला खेळ करत राहिलो आणि ऑस्ट्रेलियाला गरज भासली तर मी उपलब्ध असेन.

- डेव्हिड वॉर्नर