Duleep Trophy Final Hanuma Vihari : पश्‍चिम विभाग-दक्षिण विभाग यांच्यामधील दुलीप क्रिकेट करंडकाच्या अंतिम लढतीला बुधवारपासून सुरुवात झाली. पश्‍चिम विभागाच्या गोलंदाजांनी केलेल्या प्रभावी कामगिरीमुळे दक्षिण विभागाची पहिल्या दिवसअखेरीस ७ बाद १८२ धावा अशी अवस्था झाली. कर्णधार हनुमा विहारीच्या ६३ धावा आतापर्यंतच्या डावाचे वैशिष्ट्य ठरल्या. पावसाच्या व्यत्ययामुळे पहिल्या दिवशी ६५ षटकांचाच खेळ होऊ शकला.

पश्‍चिम विभागाने नाणेफेक जिंकून प्रथम क्षेत्ररक्षण करण्याचा निर्णय घेतला. रवीकुमार समर्थ (७ धावा), मयांक अगरवाल (२८ धावा) ही सलामी जोडी ४२ धावांमध्ये पॅव्हेलियनमध्ये परतली. हनुमा विहारी व तिलक वर्मा या जोडीने ७९ धावांची भागीदारी करताना दक्षिण विभागाचा डाव सावरण्याचा प्रयत्न केला. पण अर्झान नागवासवल्ला याने तिलक याला ४० धावांवर बाद करीत जोडी तोडली.

त्यानंतर रिकी भुई (९ धावा) व सचिन बेबी (७ धावा) यांनाही अपयशाला सामोरे जावे लागले. हनुमा एका बाजूने किल्ला लढवत होता, पण शम्स मुलानीच्या गोलंदाजीवर तो बाद झाला. दक्षिण विभागाचा पाय खोलात गेला. हनुमा याने ९ चौकारांसह ६३ धावांची खेळी साकारली. आता वॉशिंग्टन सुंदर ९ धावांवर, तर विजयकुमार वैशाख ५ धावांवर खेळत आहे. पश्‍चिम विभागाकडून अर्झान नागवासवल्ला, चिंतन गजा व शम्स मुलानी यांनी प्रत्येकी दोन मोहरे टिपले.

संक्षिप्त धावफलक ः दक्षिण विभाग पहिला डाव ६५ षटकांत ७ बाद १८२ धावा (मयांक अगरवाल २८, तिलक वर्मा ४०, हनुमा विहारी ६३, अर्झान नागवासवल्ला २/४५, चिंतन गजा २/२७, अतित सेठ १/४७, शम्स मुलानी २/१९) वि. पश्‍चिम विभाग.