FIFA World Cup Qatar Beer Banned : फिफा आणि कतारने वर्ल्डकप सुरू होण्यापूर्वी 48 तास आधीच आपली बीअरबाबतची भुमिका बदलत स्टेडियममध्ये बीअरवर संपूर्णपणे बंदी आणली आहे. यामुळे फुटबॉल चाहत्यांना तसेच बीअर विक्री करणाऱ्या कंपन्यांना चांगलाच धक्का बसला आहे. फिफा वर्ल्डकप पाहण्यासाठी येणाऱ्या फुटबॉल चाहत्यांमध्ये बीअर फार प्रसिद्ध असते. विशेषकरून युरोपातील चाहते बीअरसोबतच फुटबॉलचा आनंद घेत असतात. मात्र कतार हे मुस्लीम राष्ट्र असल्याने या देशात मद्यपानावर बंदी आहे. त्यामुळे कतारने हा निर्णय घेतला.

फिफाने आपल्या आपल्या अधिकृत वक्तव्यात म्हटले होते की मद्य हे फक्त फॅन झोनमध्ये मिळेल. कतारमधील फिफा वर्ल्डकप होणाऱ्या स्टेडियमवरील आवारातून बीअर विक्री केंद्रे हटवण्यात आली आहेत.' दरम्यान, कतार आणि इक्वाडोर सामन्यासाठी स्टेडियमवर अनेक बीअर टेंट उभारण्यात आले होते.

फिफा वर्ल्डकप पाहण्यासाठी कतारमध्ये जवळपास 10 लाख विदेशी चाहते येतील असा अंदात आहे. जगातील सर्वात मोठा इव्हेंट फिफा वर्ल्डकप हा 29 दिवस चालणार आहे. बीअर उत्पादन करणारी कंपनी बडवाईजर आणि फिफाची आधीपासूनच भागीदारी आहे. दरम्यान, मिळालेल्या माहितीनुसार व्हीआयपी सुटमध्ये बीअर मिळणार आहे.