महिला टेनिस जगतात दुसऱ्या स्थानावर असलेल्या जपानच्या नाओमी ओसाकाने (Naomi Osaka) फ्रेंच ओपन (French Open) स्पर्धेतून माघार घेतली आहे. डिप्रेशनमुळे हा निर्णय घेतल्याचे नाओमीने म्हटले आहे. याच कारणामुळे स्पर्धेतील पहिल्या विजयानंतर ती मीडियासमोर आली नव्हती, असेही स्पष्टीकरण तिने दिले. याप्रकरणात नियमावलीच्या उल्लंघनाचा दाखला देत फ्रेंच टेनिस फेडरेशनने तिच्यावर 11 लाख रुपये दंडाची कारवाई केली होती. जपानी खेळाडूने स्पर्धेतून माघार घेतल्यानंतर आणि त्यासंदर्भातील नेमकं कारण समोर आल्यावर आता फ्रेंच टेनिस फेडरेशनने तिची माफी मागितलीये. (french tennis federation head gilles moretton admitted sorry and sad over naomi osaka withdrawal)

फेडरेशनचे अध्यक्ष जाइल्‍स मोरेटन म्हणाले की, नाओमी ओसाका हिने स्पर्धेतून माघार घेतल्याचा निर्णय दुर्देवी आहे. मानसिक परिस्थितीतून सावरुन ती लवकर कोर्टवर उतरावी, अशी सदिच्छाही मोरेटन यांनी व्यक्त केलीये.

डिप्रेशनचा सामना करतेय नाओमी

नाओमीने फ्रेंच ओपन स्पर्धेत भाग घेतल्यानंतर मीडियाला सामोरे न जाण्याचा निर्णय घेतला होता. पहिल्या सामन्यानंतर ती म्हणण्यानुसार वागली. त्यानंतर आयोजकांनी तिच्यावर दंडाची कारवाई केली. एवढेच नाही तर पुढेही असे कृत्य केल्यास कठोर कारवाईचा इशाराही दिला होता. त्यानंतर नाओमी काय भूमिका घेणार याकडे सर्वांचे लक्ष लागून असताना तिने स्वत: स्पर्धेतून माघार घेतल्याची घोषणा केली. सोशल मीडियाच्या माध्यमातून नाओमीने स्पर्धेतून माघार घेण्यामागचे कारण स्पष्ट केले आहे.

तिने लिहिलंय की, 2018 मधील अमेरिकन ओपन स्पर्धेपासून मी डिप्रेशनचा सामना करत आहे. यातून सावरण्याठी मला कठिण परिस्थितीतून जावे लागत आहे. मी स्वत: मध्ये गुंग असते हे मला ओळखणाऱ्यांना चांगलेच माहित आहे. त्यामुळेच माझ्या कानात तुम्हाला नेहमी हेडफोन वापरते. यामुळे चिंता थोडीफार दूर होण्यास मदत होते, असे नाओमीने लिहिले आहे. पॅरिसमध्ये स्वत:ला असुरक्षित वाटत होते. त्यामुळेच मीडियापासून दूर राहण्याचा निर्णय घेतला होता, असा उल्लेखही तिने आपल्या पोस्टमध्ये केलाय.