ICC Womens World Cup 2022 : दक्षिण आफ्रिके विरुद्धच्या (South Africa Women) 'करो वा मरो' लढतीत भारतीय महिला संघ (India Women) पहिल्यांदा बॅटिंग करुन दक्षिण आफ्रिकेसमोर टार्गेट सेट करणार आहे. मिताली राजने टॉस जिंकून पहिल्यांदा फलंदाजी करण्याचा निर्णय भारतीय सलामी बॅटरनी सार्थ ठरवला. स्मृती मानधना (Smriti Mandhana) आणि शफाली वर्मा (Shafali Verma) यांनी प्रत्येक षटकात सरासरी 6 पेक्षा अधिक धावा करत संघाला दमदार सुरुवात करुन दिली. शफाली वर्मा अर्धशतकी खेळी करुन तंबूत परतली. रन आउटच्या रुपात तिने 53 धावांवर विकेट टाकली. स्मृती मानधनाने तिच्या साथीनं पहिल्या विकेटसाठी 91 धावांची भागीदारी केली. दक्षिण आफ्रिके विरुद्धच्या लढतीत स्मृती मानधाने खास विक्रमाला गवसणी घातली. वर्ल्ड कप स्पर्धेत भारताकडून 500 धावांचा टप्पा पार करण्याचा पराक्रम तिने आपल्या नावे केला.

स्मृती मानधनाने कर्णधार मिताली राजच्या (Mithali Raj) साथीनंही आश्वासक भागीदारी रचली. या दोघींनी तिसऱ्या विकेटसाठी संघाच्या धावसंख्येत 80 धावांची भर घातली. स्मृती मानधना न्यूझीलंडमध्ये सुरु असलेल्या वर्ल्ड कप स्पर्धेत दुसरे शतक झळकावेल, असे वाटत असताना मसबता क्लास हिने तिची विकेट घेतली.

स्मृती मानधनाने 84 चेंडूत 71 धावांची खेळी केली. आपल्या या खेळीत तिने 6 चौकार आणि एक षटकारही खेचला. स्मृतीनं साखळी फेरीतील 7 सामन्यातील 7 डावात 46. 71 च्या सरासरीनं 327 धावा केल्या आहेत. एका शतकासह भारताकडून ती सर्वाधिक धावा करणारी बॅटर असून स्पर्धेत सर्वाधिक धावा करणाऱ्या बॅटरमध्ये ती चौथ्या स्थानावर आहे.