India vs Australia Test Series : पहिला कसोटी सामना इतक्या लवकर संपेल असे वाटले नव्हते. ऑस्ट्रेलियाचा दुसरा डाव एका सत्रात आटोपला जाईल असा विचार तर अजिबात केला नव्हता. याचे संपूर्ण श्रेय आपल्या तीन दादा फिरकी गोलंदाजांना जाते ज्यांनी अव्याहतपणे समोरच्या फलंदाजांवर दडपण ठेवले. अश्विन, जडेजा आणि अक्षर संघात असल्याचा मोठा फायदा आहे. तिघांपैकी कोणाला मारा करायला बोलवायचे हा माझ्यासमोर प्रश्न असतो. सगळेच गोलंदाजी करायला सतत उत्सुक असतात, अशी प्रशंसा कर्णधार रोहित शर्माने पहिल्या कसोटी सामन्यानंतर केली.

खेळपट्टी चांगली होती. चेंडूला वेग मिळत नव्हता आणि उसळीही कमी होती. आपल्या गोलंदाजांकडे असलेले कौशल्य त्यांच्या सुधारणेच्या ध्यासातून आले आहे. अश्विनने आपल्या भात्यात वेगवेगळी अस्त्रं कष्टाने जमा केली आहेत. जडेजा तर फलंदाजी गोलंदाजी आणि क्षेत्ररक्षणाचे अफलातून पॅकेज आहे. आम्ही पाच दिवस कठोर परिश्रम करायच्या तयारीने सामन्यात उतरतो होतो, असे रोहितने सामन्यानंतर सांगितले.

तो पुढे म्हणाला, खेळपट्टी आव्हानात्मक होती त्यामुळे सगळे प्रमुख फलंदाज एकत्र चमकणार नाहीत. त्यामुळे छोट्या भागीदाऱ्या रचण्यावर आमचा भर होता. संघाला गरज असताना माझ्याकडून शतकी खेळी झाली याचे समाधान व आनंद आहे. आम्ही सगळ्यांनी मिळून सामन्याअगोदर केलेला योग्य सराव कामी आला.

ऑस्ट्रेलियाकडून जोरदार प्रतिकार अपेक्षित

मालिका चार सामन्यांची आहे आणि ऑस्ट्रेलियन संघ जोरदार पुनरागमन करू शकतो याची आम्हाला जाणीव आहे. त्यांच्या संघातील खेळाच्यात तशी क्षमता आहे. आम्ही मागे काय झाले याचा विचार न करता वर्तमानकाळात राहून चांगले क्रिकेट परत कसे खेळता येईल याचा विचार करतो आहोत, असे रोहित म्हणाला.

सामना विसरलेलाच बरा: कमिन्स

नागपूर कसोटी सामन्याचा विचार करण्यापेक्षा हा सामना विसरलेला बरा. आमचे सगळेच आडाखे चुकले. फलंदाजांना सतत संभ्रमात टाकण्यात भारतीय फिरकी गोलंदाज यशस्वी ठरले. त्यांच्या गोलंदाजांच्यात सातत्य आहे. तसेच त्यांना फिरकीला साथ देणाऱ्या खेळपट्टीवर खेळायचा अनुभव आहे. आणि कौशल्यही हे मान्य करावे लागेल, असे ऑस्ट्रेलिया कर्णधार कमिन्सने सांगितले.