India vs Australia 3rd Test : ऑस्ट्रेलियाविरुद्ध उद्यापासून सुरू होणाऱ्या इंदूर कसोटीपूर्वी केएल राहुल चर्चेचा विषय राहिला. खराब फॉर्ममधून जात असलेल्या राहुलला प्लेइंग-11 मध्ये स्थान मिळणार की नाही हा प्रश्न भारतीय क्रिकेट चाहत्यांच्या मनात आहे.

केएल राहुलला शेवटच्या दोन कसोटी सामन्यांसाठी उपकर्णधार पदावरून हटवण्यात आल्यामुळे त्याला स्थान मिळण्याची शक्यताही कमी झाली आहे. सामन्याच्या एक दिवस आधी कर्णधार रोहित शर्माने केएल राहुलला उपकर्णधारपदावरून हटवण्याचे कारण सांगितले आहे.

केएल राहुलला पहिल्या दोन कसोटी सामन्यांसाठी संघाचा उपकर्णधार बनवण्यात आले होते. पण राहुलला बॅटने काही चमत्कार दाखवता आला नाही. यानंतर निवड समितीने त्याला संघात ठेवले, मात्र उपकर्णधारपद त्याच्याकडून काढून घेण्यात आले. यावर रोहित शर्माने मौन सोडले आणि म्हणाला की, केएल राहुलला उपकर्णधारपदावरून हटवण्यात काही अर्थ नाही. या गोष्टीला फार महत्त्व देऊ नये.

केएल राहुलला वाईट काळात कर्णधार आणि संघ व्यवस्थापनाचा पूर्ण पाठिंबा असल्याचे रोहित शर्माच्या वक्तव्यावरून स्पष्ट दिसत होता. मात्र प्लेइंग-11 मध्ये केएल राहुलच्या जागेवर सातत्याने प्रश्न उठत आहे. सराव सत्रादरम्यान प्रशिक्षक राहुल द्रविडने शुभमन गिलसोबत बराच वेळ घालवला आहे. अशा स्थितीत शानदार फॉर्मात असलेला गिल तिसऱ्या कसोटीत राहुलची जागा घेऊ शकतो, अशी अटकळ बांधली जात आहे.

केएल राहुलनंतर संघाला कोणताही नवीन उपकर्णधार मिळालेला नाही. बीसीसीआयने संघ जाहीर करताना कोणालाही उपकर्णधार बनवले नाही. कर्णधार रोहित शर्माकडे उपकर्णधार नियुक्तीचे अधिकार असतील, असे बीसीसीआयने स्पष्ट केले आहे. पुजारा, अश्विन आणि जडेजा हे उपकर्णधारपदाचे दावेदार म्हणून पाहिले जात आहेत. तिसऱ्या कसोटीत या तिघांपैकी एक उपकर्णधारपदाची जबाबदारी सांभाळताना दिसतो.