बंगळूर : ऑस्ट्रेलियासमोर अखेरच्या टी-२० लढतीत विजयासाठी १० धावांचे आव्हान होते. याप्रसंगी हे षटक टाकण्यासाठी अर्शदीप सिंगच्या हाती चेंडू सोपवण्यात आला. पहिल्या तीन षटकांमध्ये ३७ धावांची लूट करणाऱ्या अर्शदीपने या षटकात अवघ्या तीन धावा दिल्या आणि भारताला सहा धावांनी विजय मिळवून दिला.

याच पार्श्वभूमीवर अर्शदीप याच्याकडून कर्णधार सूर्यकुमार यादव व संघ व्यवस्थापनाने दाखवलेल्या विश्‍वासामुळे यश संपादन करता आल्याची भावना व्यक्त करण्यात आली.

अर्शदीप पुढे म्हणाला, माझ्या गोलंदाजीवर मोठ्या प्रमाणात धावा प्रतिस्पर्ध्यांना मिळाल्या, पण देवाच्या कृपेने चमक दाखवण्याची आणखी संधी मिळाली. संघ व्यवस्थापन व कर्णधार सूर्यकुमार यांनी माझ्यावर विश्‍वास दाखवला.

सूर्यकुमारने मला सांगितले की, जे होईल ते होऊदे. तू तुझी कामगिरी कर, असा सल्ला त्याच्याकडून देण्यात आला. गेल्या काही काळामध्ये खूप काही शिकायला मिळाले. चुकांमधून सुधारणा करण्याचा प्रयत्न केला.

वॉशिंग्टन सुंदर असता तर...

बंगळूरमधील पाचव्या लढतीत भारताने मिळवलेल्या विजयात अक्षर पटेल व रवी बिश्‍नोई हे फिरकी गोलंदाज चमकले. या लढतीसाठी भारतीय संघात एखादा जादा फिरकीपटू असता तर भारतीय संघ अधिक सहज जिंकला असता, असे कर्णधार सूर्यकुमार यादव याला वाटते.

तो या वेळी म्हणाला, अक्षर पटेल, रवी बिश्‍नोई या दोन फिरकीपटूंसह वॉशिंग्टन सुंदर या फिरकीपटूचा समावेश संघात असता तर भारतीय संघाला आणखी मोठा विजय मिळवता आला असता.

माझ्या गोलंदाजीवर जास्त धावा काढण्यात आल्या होत्या. अखेरच्या षटकात माझ्याकडे चेंडू दिल्यानंतर भारतीय संघ पराभूत होऊ नये असे मनोमनी वाटत होते. सूर्यकुमार यादवचा विश्‍वास माझ्यासोबत होता. मॅथ्यू वेडला सुरुवातीला बाऊन्सर टाकून त्याच्या मनामध्ये संशय निर्माण केला. त्यानंतर तो बाद झाल्यानंतर विजयाची हमी मिळाली.

- अर्शदीप सिंग