Ind vs Aus Test Match : ऑस्ट्रेलियाविरुद्धचे पहिले दोन कसोटी सामने तीन दिवसांत जिंकून भारतीय संघाने निर्विवाद वर्चस्व मिळवलेले असले, तरी माजी सलामीवीर आणि समालोचक गौतम गंभीर याने टीम इंडियाला गाफिल न राहण्याचा सल्ला दिला आणि याच ऑस्ट्रेलियाविरुद्ध एका कोलकता कसोटीत व्ही.व्ही.एस. लक्ष्मण आणि राहुल द्रविड यांच्या विक्रमी भागीदारीने कसा उलटवार केला होता, याचे उदाहरणही दिले.

चार कसोटी सामन्यांच्या मालिकेत भारताने पहिले दोन सामने जिंकून बॉर्डर-गावसकर करंडक आपल्याकडेच राखला असला, तरी मालिका अजून जिंकलेली नाही. तसेच आणखी एक सामना जिंकून कसोटी अजिंक्यपद अंतिम सामना खेळण्याचेही उद्दिष्ट गाठायचे आहे. यासाठी गौतम गंभीरने भारतीय संघाला सावधगिरीचा इशारा दिला.

2001-2002च्या मोसमात ऑस्ट्रेलियाचा संघ तीन कसोटी सामन्यांच्या मालिकेसाठी भारतात आला होता. मुंबईत झालेल्या पहिल्या कसोटीत ऑस्ट्रेलियाने भारतीय संघाला धुव्वा उडवला होता. त्यानंतर कोलकता कसोटीत भारताला पहिल्या डावात फॉलोऑनही दिला; पण दुसऱ्या डावात लक्ष्मण (281) आणि राहुल द्रविड (180) यांनी 376 धावांची विक्रमी भागीदारी करून ऑस्ट्रेलियावर डाव उलटवला होता. कोलकत्तानंतर चेन्नईत झालेल्या सामन्यात भारताने विजय मिळवून मालिका 2-1 अशी जिंकली होती. गंभीरने रोहित शर्माच्या भारतीय संघाने आता 2-0 आघाडी घेतलेली असली, तरीही सावध राहण्याचा सल्ला दिला आहे.

आत्ताची ही मालिका भारत 4-0 अशी जिंकेल, असे भाकित मी करणार नाही. कारण ऑस्ट्रेलिया संघात स्टीव स्मिथ, मार्नस लाबूशेन आणि उस्मान ख्वाजा सारखे फिरकीचा सामना करू शकणारे फलंदाज आहेत. यापैकी एकाने जरी मोठी शतकी खेळी केली, तरी ऑस्ट्रेलिया उलटवार करू शकेल, असे गंभीरने म्हटले आहे.