रोहितने ठोकले ७ चौकार आणि १ षटकार

Ind vs Eng 3rd Test Day 3: भारतीय संघाचा तडाखेबाज सलामीवीर रोहित शर्मा याने इंग्लंडविरूद्ध दुसऱ्या डावात झुंजार अर्धशतकी खेळी केली. पहिल्या डावात रोहितने १०५ चेंडूंचा सामना करून केवळ १९ धावा केल्या होत्या. दुसऱ्या डावात मात्र त्याने आपल्या धावगतीत सुधारणा केली. टीम इंडियाच्या हिटमॅनने संयमी पण वेगवान खेळी करत दमदार अर्धशतक केले. रोहितने १५६ चेंडूत ५९ धावांची खेळी केली. त्यात त्याने ७ चौकार आणि १ षटकार खेचला. त्यामुळे हिटमॅनचा नेटकऱ्यांनी अक्षरश: जयजयकार केला. पाहा त्यापैकी निवडक ट्वीट्स-

दरम्यान, भारतीय संघाचा सलामीवीर लोकेश राहुल स्वस्तात बाद झाल्यावर रोहित शर्मा आणि चेतेश्वर पुजारा जोडीने संघाचा डाव सावरला. या दोघांनी दमदार खेळी करत संघाला शंभरी गाठून दिली. चहापानाची विश्रांती होईपर्यंत या दोघांनी संघाला ११२ धावांची मजल मारून दिली. दोघांनीही संयमी पण वेगवान खेळी करत धावा करणं सुरूच ठेवलं. त्यामुळे भारतीय फलंदाजांवरील दडपण कमी झाले.

रोहितच्या बाद होण्यावरून वाद

रोहित शर्मा ५९ धावांवर असताना पायचीत झाला. रोहित नक्की बाद होता की नव्हता याबद्दल चांगलीच चर्चा रंगली. रोहितच्या पायाला चेंडू लागला आणि गोलंदाजाने अपील केले. पंचांनी त्याला बाद ठरवल्यावर रोहितने DRS घेतला. DRSमध्ये जे दिसलं त्यात थर्ड अंपायरने रोहितला अंपायर्स कॉलच्या आधारावर बाद ठरवले. पण नेटकऱ्यांनी मात्र या निर्णयाबाबत नाराजी व्यक्त केली.