India Archery Paris Olympic 2024 : पॅरिस ऑलिम्पिक २०२४ स्पर्धेत भारताचे तिरंदाज धीरज बोम्मादेवरा आणि अंकिता भकत ही जोडी इतिहास रचण्यापासून थोडक्यात हुकली. त्यांना शुक्रवारी (२ ऑगस्ट) तिरंदाजीच्या मिश्र गटात कांस्य पदकाच्या सामन्यात पराभवाचा सामना करावा लागला.

कांस्य पदकाच्या सामन्यात धीरज आणि अंकिता यांना अमेरिकेच्या कॅसी कौफहोल्ड आणि ब्रॅडी एलिसन या जोडीने पराभूत केले. त्यांनी भारताला ६-२ अशा फरकाने पराभूत केले.

दरम्यान, भारताला आत्तापर्यंत ऑलिम्पिकमधील तिरंदाजीत कधीच पदक जिंकता आलेलं नव्हतं. आता भारताची पदकाची प्रतिक्षा आणखी लांबली आहे.

थोडक्यात हुकलं पदक...

कांस्य पदकाच्या लढतीत पहिल्या सेटमध्ये अमेरिकेच्या जोडीनं भारताला ३७-३८ अशा पाँइंट्सने मागे टाकले, दुसरा सेटही अमेरिकेनं ३५-३७ अशा फरकाने सहज जिंकला होता. मात्र तिसऱ्या सेटमध्ये धीरज-अंकिताने पुनरागमन करत आशा उंचावल्या होत्या.

त्यांनी तिसरा सेट ३८-३४ फरकाने जिंकला होता. मात्र, चौथ्या सेटमध्ये पुन्हा अमेरिकेची जोडी त्यांच्यावर भारी पडली. अमेरिकेने चौथा सेट भारताविरुद्ध ३७-३५ असा जिंकला. त्यामुळे भारताला या सामन्यात पराभवाचा सामना करावा लागला आणि पदकापासून थोडक्यात मुकावे लागले.

शुक्रवारचा दिवस अंकिता-धीरजसाठी ठरलेला विक्रमी

दरम्यान, अंकिता आणि धीरज यांनी शुक्रवारीच उपउपांत्यपूर्व, उपांत्यपूर्व आणि उपांत्य फेरीतील सामनेही खेळले.

दरम्यान, उपउपांत्यपूर्व फेरीत अंकिता आणि धीरज यांनी इंडोनेशियाच्या दिआनंद कोइरुनसिमा आणि अरिफ पेंगस्तू यांना ५-१ गुणांच्या फरकाने पराभूत केले होते. त्यानंतर त्यांनी उपांत्यपूर्व फेरीत स्पेनच्या एलिया कॅनालेस आणि पाब्लो गोन्झालेज अछा या जोडीला ५-३ अशा गुणांच्या फरकाने पराभूत केले होते.

मात्र त्यानंतर बलाढ्य कोरियाच्या जोडीविरुद्ध उपांत्य सामन्यात पराभवाचा सामना करावा लागला. कोरियाच्या सियुन लिम आणि वूजिन किम या जोडीने भारताला ६-२ अशा फरकाने पराभूत केले होते. त्यामुळे भारताची सुवर्ण किंवा रौप्य पदक जिंकण्याची संधी हुकली. मात्र भारताला कांस्य पदकासाठी खेळण्याची संधी मिळाली.