Neeraj Chopra in Men's Javelin Throw Final at Paris Olympic 2024: पॅरिस ऑलिम्पिक २०२४ स्पर्धेतील मंगळवारी ११ व्या दिवसाचे खेळ खेळले जात आहेत. आता मंगळवारी भारताचं सर्वात मोठं आशास्थान असलेला नीरज चोप्रा मैदानात उतरला आहे. मंगळवारी पुरुषांच्या भालाफेकीची क्वालिफायर्स खेळवण्यात आली.

या क्वालिफायर्समध्ये भारताचा गोल्डन बॉय नीरज चोप्राचा समावेश बी ग्रुपमध्ये करण्यात आला होता. या ग्रुपमध्ये त्यानेच सर्वात पहिल्यांदा भाला फेकला. यावेळी त्याने पहिल्याच प्रयत्नात तब्बल ८९.३४ मीटर अंतरावर भाला फेकला आणि अंतिम फेरीतील स्थान पक्के केले.

विशेष म्हणजे याआधी झालेल्या ए ग्रुपमधील क्वालिफायर्समधील १६ खेळाडूंपेक्षाही नीरजचे अंतर सर्वोत्तम ठरले आहे. ए ग्रुपमध्ये अव्वल क्रमांकावर जर्मनीचा ज्युलियन वेबर राहिला होता. त्याने ८७.७६ मीटर भाला फेकला होता.

दरम्यान, अ ग्रुपमध्ये भारताचा किशोर जेना होता. मात्र तो या ग्रुपमध्ये ९ व्या क्रमांकावर राहिला. त्याने सर्वोत्तम ८०.७३ मीटर भाला फेकला. त्यामुळे त्याचं या स्पर्धेतील आव्हान संपले. त्यानेही ही भालाफेक पहिल्या प्रयत्नात केली होती. दुसऱ्या प्रयत्न त्याचा अपयशी ठरला. तिसऱ्या प्रयत्नात त्याने ८०.२१ मीटर भाला फेकला होता.

लक्षात घेण्यासारखी गोष्ट अशी की या क्वालिफायर्समध्ये ८४ मीटरच्या पुढे भालाफेक करणाऱ्यांना थेट अंतिम फेरीत प्रवेश देण्यात आला. तसेच दोन्ही ग्रुपमधून अव्वल १२ क्रमांकामध्ये राहणाऱ्या खेळाडूंनाही अंतिम फेरीत स्थान देण्यात आले आहे.

नीरजचे सर्वात मोठे आव्हान

टोकियो ऑलिम्पिकमध्ये भालाफेकीत सुवर्णपदक जिंकणाऱ्या नीरजसमोर यंदा झेक प्रजासत्ताक याकुब वाडलेच, जर्मनीचा ज्युलियन वेबर, पाकिस्तानचा अर्शद नदीम, ग्रेनेडाचा अँडरसन पीटर्स यांचं सर्वात मोठं आव्हान असणार आहे.

या चारही जणांनी अंतिम फेरीत धडक मारली आहे. क्वालिफायर्समध्ये नीरजपाठोपाठ अँडरसन पीटर्सनेही तोडीस तोड ८८.६३ मीटरचा भाला फेकला, तर अर्शद नदीमने ८६.५९ मीटर भाला फेकला. ज्युलियन वेबरने ८७.७६ मीटर भाला फेकला, तर याकुबने ८५.६३ मीटर भाला फेकला.