SAFF Women's Championship : आशिया कप क्रिकेट स्पर्धेत भारत पाकिस्तान ड्रीम फायनल होणार या आशेवर बसलेल्या क्रिकेट चाहत्यांची निराशा झाली. भारत सुपर 4 मध्ये पाकिस्तान आणि श्रीलंका यांच्याकडून पराभूत झाला आणि स्पर्धेतील आव्हान जवळपास संपुष्टात आले. मात्र निराश झालेल्या क्रीडा रसिकांसाठी भारतीय महिला फुटबॉल संघाने आनंदाची बातमी दिली. SAFF Women's Championship मध्ये गतविजेत्या भारताने पाकिस्तानचा 3 - 0 असा पराभव केला. (India Women's Football Team Defeat Pakistan)

नेपाळमधील काठमांडू येथील दशरथ स्टेडियमवर झालेल्या सामन्यात आज भारताने पाकिस्तानचा 3 - 0 अशा गोलफरकाने पराभव करत स्पर्धेची विजयी सुरूवात केली. भारताने या अजिंक्यपद स्पर्धेतील आपली विजयाची घोडदौरड 27 सामने कामय राखली आहे.

भारत पाकिस्तान सामन्यात पाकिस्तानची कर्णधार मारिया जमील खानने स्वयम गोल करत भारताला आघाडी मिळवून दिली होती. त्यानंतर दांगमेई ग्रेसने पहिल्या हाफमध्ये अजून एक गोल करत पाकिस्तानविरूद्ध 2 - 0 अशी आघाडी घेतली. मात्र दुसऱ्या हाफमध्ये पाकिस्तानने स्वतःवर गोल होऊ दिला नव्हता. परंतु एक्स्ट्रा टाईममध्ये भारताच्या सौम्या गगुलोथने पाकिस्तानवर अजून एक गोल करत भारताचा विजय 3 - 0 असा साकारला. आता भारताचा पुढचा सामना 10 सप्टेंबरला मालदीवसोबत होणार आहे.