नवी दिल्ली : भारताची अव्वल सायकलपटूने राष्ट्रीय स्प्रींट टीमचे प्रमुख प्रशिक्षक आर. के. शर्मा यांच्यावर गैरवर्तणूक केल्याचा आरोप केला आहे. हा प्रकार संघ स्लोव्हेनियामध्ये सराव करत असताना झाल्याचे अधिकाऱ्यांनी सांगितले. इंडियन एक्सप्रेसने दिलेल्या बातमीनुसार स्पोर्ट्स अथॉरिटी ऑफ इंडियाला (SAI) या तक्रारीचा मेल पाठवण्यात आला आहे. (Indian Women Cyclist Allegation On Head Coach of Inappropriate Behavior)

साईने (SAI) दिलेल्या वक्तव्यानुसार 'तक्रार करणाऱ्या खेळाडूला त्वरित भारतात आणण्यात येणार आहे. तिच्या सुरक्षेसाठी हा निर्णय घेण्यात आला आहे.' याचबरोबर साई आणि सायकलिंग फेडरेशन ऑफ इंडिया यांनी दोन स्वतंत्र चौकशी समिती स्थापन केल्या आहेत. दरम्यान, सीएफआयने (Cycling Federation of India) तक्रार करणाऱ्या खेळाडूच्या बाजूने उभे राहणार असल्याचेही सांगितले.

तर साईने स्वतंत्र वक्तव्य प्रसिद्ध केले असून 'सायकलपटूने प्रशिक्षकांविरूद्ध स्लोव्हेनियामध्ये सुरू असलेल्या फॉरेन एक्सपोजर कॅम्पदरम्यान गैरवर्तणूक केल्याची तक्रार आमच्यापर्यंत पोहचली आहे.' असे त्यात म्हटले आहे.

साई आपल्या वक्तव्यात पुढे म्हणते की, 'सायकलपटूकडून तक्रार मिळाल्यानंतर लगेचच तक्रारदाराला त्याच्या सुरक्षेच्या कारणावरून भारतात बोलवण्याचा निर्णय घेण्यात आला. आम्ही या विषयाचा तपास करण्यासाठी समिती देखील स्थापन केली आहे.' साईने हे प्रकरण प्राधान्याने हाताळून लवकरात लवकर याच्या निकाल लावणार असल्याचे सांगितले.

तक्रार करणारी सायकलपटू ही भारतीय संघासोबत स्लोव्हेनिया येथे आशियाई चॅम्पियनशिपच्या तयारीसाठी गेली आहे. आशियाई चॅम्पियनशिप नवी दिल्लीत 18 ते 22 जून दरम्यान होणार आहे. प्रशिक्षक आणि इतर भारतीय सायकलपटू 14 जूनला भारतात परतण्याची शक्यता आहे.