Dipa Karmakar Retirement: भारताची स्टार जिम्नॅस्टपटू दीपा कर्माकर हिने अचानक निवृत्ती जाहीर केली आहे. दिपामुळे भारतीयांमध्ये जिम्नॅस्टीक्सचे वेड निर्माण झाले होते. २०१६ च्या रिओ ऑलिम्पिक स्पर्धेत तिने केलेल्या अविश्वसनीय कामगिरीने जगाला थक्क केले आणि अनेक लहान मुलांना प्रेरित केले. तिच्यामुळे भारतभर जिम्नॅस्टीक्सचे वारे वाहिले.. पण, रिओ ऑलिम्पिक स्पर्धेनंतर दीपाला दुखापतीमुळे कारकीर्दित फार यश मिळवता आले नाही आणि आज तिने अचानक निवृत्ती जाहीर केली. ‘खूप विचार केल्यानंतर मी हा निर्णय घेतला आहे. मी जिम्नॅस्टीक्समधून निवृत्ती घेत आहे. हा निर्णय माझ्यासाठी सोपा नक्की नव्हता, परंतु हिच ती योग्य वेळ आहे. जिम्नॅस्टीक्स हा माझ्या आयुष्याचा खूप महत्त्वाचा भाग आहे आणि मी हा प्रवास एन्जॉय केला,’ अशी पोस्ट दीपाने लिहिली.

दीपाचा पाय जन्मतः सपाट होता, परंतु तिने अशक्य कामगिरी शक्य करून दाखवली. ऑलिम्पिकसाठी पात्र ठरणारी दीपा कर्माकर ही पहिली भारतीय महिला जिम्नॅस्ट बनली. राष्ट्रकुल स्पर्धेत पदक जिंकणारी ती पहिली भारतीय महिला जिम्नॅस्टपटू आहे, शिवाय आशियाई विजेती ठरण्याचा पहिला मानही तिने पटकावला. ती इम्फाळमधील भारतीय क्रीडा प्राधिकरण (SAI) केंद्रातील वेटलिफ्टिंग प्रशिक्षक दुलाल कर्माकर यांची मुलगी आहे. दुलाल यांनी वयाच्या सहाव्या वर्षापासून दीपाला जिम्नॅस्टिकचे प्रशिक्षण देण्यास सुरुवात केली. आगरतळा येथे दीपाला प्रशिक्षक बिस्बेश्वर नंदी यांनी जिम्नॅस्टिकचे प्रशिक्षण दिले.

दीपाला कारकीर्दिच्या सुरुवातीला पायांच्या आकारामुळे अनेक समस्यांना तोंड द्यावे लागले. दीपाच्या पायाच्या आकारामुळे नंदी यांनाही तिला प्रशिक्षण देण्यासाठी खूप मेहनत करावी लागली. जिम्नॅस्टिक ही दीपाची पहिली पसंती नव्हती, मात्र वडिलांनी तिला प्रोत्साहित केले. मेहनतीच्या जोरावर तिने २००७ मध्ये  'ज्युनियर नॅशनल' स्पर्धा जिंकली. तिने व्हॉल्ट प्रकारात २०१८ मध्ये वर्ल्ड कप स्पर्धेत सुवर्ण आणि कांस्यपदकाची कमाई केली. २०१४ च्या राष्ट्रकुल स्पर्धेतही तिने कांस्यपदक जिंकले. आशियाई चॅम्पियन्सशीप स्पर्धेत तिच्या नावावर २०२४ चे सुवर्णपदक आणि २०१५ चे कांस्यपदक आहे.

२०१६ च्या रिओ ऑलिम्पिक स्पर्धेत Produnova vault या सर्वात आव्हानात्मक प्रकारात लक्षवेधी कामगिरी केली. ०.१५ गुणांनी तिचे कांस्यपदक हुकले आणि तिला चौथ्या क्रमांकावर समाधान मानावे लागले.