इंदूर : भारत आणि ऑस्ट्रेलिया यांच्यात इंदूर येथे झालेला तिसरा कसोटी सामना अवघ्या अडीच दिवसांमध्ये संपला. त्यानंतर आंतरराष्ट्रीय क्रिकेट परिषेदेने (आयसीसी) इंदूर शहरातील होळकर मैदानावरील खेळपट्टीला सुमार दर्जा दिला आहे. आता आयसीसीच्या याच सुमार दर्जावरून भारताचे माजी फलंदाज सुनील गावसकर यांनी आयसीसीवर टीका करत पक्षपात करत असल्याचे बोल सुनावले.

भारतात आणि ऑस्ट्रेलियामध्ये खेळवण्यात आलेल्या इंदूर येथील कसोटी सामना केवळ अडीच दिवसांत संपला. त्यावरून आयआयसीसीने तिथल्या खेळपट्टीला सुमार दर्जाची खेळपट्टी असा शेरा मारला.

मग ऑस्ट्रेलिया आणि दक्षिण आफ्रिका या संघांमध्ये गेल्या डिसेंबर महिन्यात ब्रिस्बेनमधील गॅबा मैदानावर खेळवण्यात आलेल्या मालिकेतील दुसरी कसोटी अवघ्या दोन दिवसांमध्ये निकाली लागली होती. तेव्हा आयसीसीने या गॅबावरील खेळपट्टीला कुठला दर्जा देऊन डिमेरीट गुण दिले होते? आयसीसीने पक्षपातीपणे इंदूरच्या खेळपट्टीला सुमार दर्जा दिला असल्याचे गावसकर यांनी म्हटले आहे.

इंदूरमधील खेळपट्टीला सुमार दर्जाची खेळपट्टी असा दर्जा देताना सामनाधिकारी ख्रिस ब्रॉड यांनी खेळपट्टी लढतीच्या पहिल्या दिवसापासूनच फिरकीला साथ देणारी होती. या सामन्यात फलंदाज आणि गोलंदाजांमध्ये कुठल्याच प्रकारची स्पर्धा बघायला मिळाली नाही.

खेळपट्टी कोरडी होती. त्यामुळे फलंदाज आणि गोलंदाजांमध्ये समतोल साधला जात नव्हता. सामन्यातील पाचवाच चेंडू वळला होता तसेच विषम प्रमाणात उसळीसुद्धा घेत होता’ असे मत प्रदर्शित केले आहे.

गावसकर उपस्थित करत असलेल्या ब्रिस्बेनमधील खेळपट्टीला आयसीसीने सरासरीपेक्षा कमी दर्जाची खेळपट्टी असा दर्जा दिला होता; तर एक डिमेरीट गुण दिला होता; मात्र इंदूरमधील खेळपट्टीला वेगळा न्याय का? कारण येथील खेळपट्टीला तीन डिमेरीट गुण दिले गेले आहेत, असा प्रश्न उपस्थित करून गावसकर यांनी आयसीसीवर पक्षपातीपणाचा आरोप लावला आहे.

जेव्हा जेव्हा भारतात कसोटी सामने खेळवले जातात, तेव्हा फक्त खेळपट्टीबद्दल बोलले जाते; मात्र परदेशातील खेळपट्ट्यांबद्दल सामना चालू असताना जास्त टिप्पणी होताना दिसत नाही.

- सुनील गावसकर