Delhi Capitals News: इंडियन प्रीमियर लीग 2024 स्पर्धा 22 मार्चपासून सुरु होणार आहे. त्यामुळे आता आयपीएलच्या या 17 व्या हंगामाला सुरुवात होण्यासाठी अवघा एक आठवडा बाकी आहे. अशातच दिल्ली कॅपिटल्स मोठे धक्के मिळाले आहे.

नुकतेच दिल्लीने लिलावात खरेदी केलेला फलंदाज हॅरी ब्रुकने आयपीएल 2024 मधून आजीच्या निधनामुळे माघार घेतली आहे. त्यानंतर आता दिल्लीचा प्रमुख वेगवान गोलंदाज लुंगी एन्गिडीनेही आयपीएल 2024 मधून माघार घेतली आहे. तो दुखापतीमुळे या संपूर्ण हंगामातून बाहेर झाला आहे.

एन्गिडीऐवजी ऑस्ट्रेलियाच्या 21 वर्षीय जॅक फ्रेझर-मॅकगर्क याला बदली खेळाडू म्हणून दिल्ली कॅपिटल्सने करारबद्ध केले आहे.

याबद्दल आयपीएलने प्रसिद्धीपत्रक जाहीर करत माहिती दिली आहे. फ्रेझर-मॅकगर्कने ऑस्ट्रेलियासाठी नुकतेच फेब्रुवारीमध्ये 2 वनडे सामने खेळले आहेत. तसेच तो त्याआधी ऑस्ट्रेलियाच्या 19 वर्षांखालील संघाकडूनही खेळला आहे. त्याला दिल्ली कॅपिटल्सने 50 लाखांच्या किंमतीत संघात स्थान दिले आहे.

दरम्यान, फ्रेझर-मॅकगर्ककडे ऑस्ट्रेलियाचा उदयोन्मुख खेळाडू म्हणून पाहिले जात आहे. त्याने बीबीएलमध्ये ही शानदार खेळी केली होती. रिकी पाँटिंगनेही त्याचे कौतुक करताना तो डेव्हिड वॉर्रनच्या तरुणपणाची आठवण करून देत असल्याचे म्हटले होते.

एन्गिडीने आयपीएलमध्ये आत्तापर्यंत 14 आयपीएल सामने खेळले असून 25 विकेट्स घेतल्या आहेत.

ऋषभ पंतचे पुनरागमन

दरम्यान, दिल्लीच्या काही खेळाडूंनी माघार घेतली असली, तरी ऋषभ पंतच्या पुनरागमनाने दिल्लीला दिलासा मिळाला आहे. साल 2022 च्या अखेरीस पंतचा कार अपघात झाला होता. त्यात तो जखमी झाला होता. त्यामुळे त्याला वर्षभर क्रिकेटला मुकावे लागले.

पण आता तो पूर्ण तंदुरुस्त झाला असून त्याला यष्टीरक्षक फलंदाज म्हणून खेळवण्यासाठी बीसीसीआयने परवानगी दिली आहे. त्यामुळे पंत पुन्हा एकदा दिल्ली कॅपिटल्सकडून आयपीलमध्ये खेळताना दिसणार आहे. यासह तो 14 महिन्यांनंतर क्रिकेटमध्येही पुनरागमन करणार आहे.

तो आयपीएल 2024 मध्ये दिल्लीचे नेतृत्व करतानाही दिसू शकतो.