Arshdeep Singh : पंजाब किंग्जचा गोलंदाज अर्शदीप सिंग चांगलाच चर्चेत आला आहे. त्याच्या 'स्टंप ब्रेकिंग' गोलंदाजीमुळे पंजाबने रोमांचक सामन्यात मुंबई इंडियन्सचा पराभव केला. आता या स्टंप तोडण्याच्या कामगिरीच्या माध्यमातून दिल्ली पोलिसांनी ट्रॅफिक नियम पाळण्याचा इशारा दिला आहे.

दिल्ली पोलिसांनी आज (रविवार) इन्स्टाग्राम आणि ट्विटरवर एक पोस्ट शेअर केली आहे. पोलिसांनी तुटलेल्या स्टंपचा फोटो पोस्ट केला. " स्टंप तोडा, पण ट्रॅफिक सिग्नल तोडू नका. सोबतच पोस्टच्या कॅप्शनमध्ये लिहिले होते- ट्रॅफिक सिग्नल तोडल्यानंतरच चालानचे 'बक्षीस' मिळते." असे ट्विट दिल्ली पोलिसांनी केले आहे.

आयपीएल २०२३ चा ३१ वा सामना मुंबई इंडियन्स आणि पंजाब किंग्ज यांच्यात खेळला गेला. मुंबईचा कर्णधार रोहित शर्माने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना पंजाबने २० षटकांत ८ गडी गमावून २१४ धावा केल्या. प्रत्युत्तरात मुंबई संघाला २० षटकांत ६ गडी गमावून २०१ धावाच करता आल्या.

मुंबईला ६ चेंडूत १६ धावांची गरज होती. पंजाबकडून अर्शदीप सिंग शेवटचे षटक टाकायला आला. यादरम्यान त्याने तिसऱ्या आणि चौथ्या चेंडूवर तिलक वर्मा आणि नेहल वेध्रा यांना क्लीन बोल्ड केले. या दोन विकेट्स घेताना अर्शदीपच्या चेंडूने मधल्या यष्टीचे दोन तुकडे झाले होते.

मुंबई पोलिसांनीही अर्शदीपच्या गोलंदाजीबाबत ट्विट केले आहे. एकूणच पोलिसांनी लोकांना वाहतुकीच्या नियमांची जाणीव करून देण्याचा प्रयत्न केला. त्यांच्या पोस्टला आतापर्यंत ३ लाखांहून अधिक लाईक्ससह शेकडो कमेंट्स मिळाल्या आहेत.