Hardik Pandya : भारताचा अष्टपैलू खेळाडू हार्दिक पांड्या हा अफगाणिस्तानविरूद्धची टी 20 मालिकेला मुकणार असल्याचे वृत्त विश्वसनीय सूत्रांकडून मिळाले आहे. मात्र हार्दिक पांड्या हा आयपीएलपर्यंत पूर्णपणे फिट होईल असं सांगितलं जात आहे. दरम्यान, हार्दिक पांड्याचा एक व्हिडिओ सध्या सोशल मीडियावर व्हायरल होत आहे. या व्हिडिओत हार्दिक पांड्याचे रिलायन्स इंडस्ट्रीजच्या मुख्य प्रवेशद्वाराजवळ राजेशाही स्वागत झाल्याचं दिसतंय.

हार्दिक पांड्या हा मुंबई इंडियन्सचा कर्णधार झाल्यानंतर पहिल्यांदाच जामनगरच्या रिलायन्स इंडस्ट्रीजच्या ऑफिसमध्ये पोहचला. यावेळी रिलायन्सच्या गेटवर हार्दिकचे शाही स्वागत करण्यात आलं. हे स्वागत पाहून सर्वांनाच आश्चर्याचा धक्का बसला आहे.

जामनगरच्या रिलायन्स इंडस्ट्रीजच्या मेन गेटवर हार्दिकचे घोडस्वारांच्या ड्रीलने स्वागत करण्यात आलं. त्यानंतर या घोडस्वारांनी हार्दिकला एस्कॉट केलं. याचा व्हिडिओ सध्या सोशल मीडियावर चांगलाच व्हायरल होत आहे.

हार्दिक पांड्या 2021 मध्ये मुंबई इंडियन्स सोडून गुजरात टायटन्समध्ये दाखल झाला होता. गुजरातचे नेतृत्व करताना हार्दिकने पहिल्याच सत्रात विजेतेपदाला गवसणी घातली होती. त्यानंतर गेल्या हंगामात आयपीएलची फायनल गाठून दिली.

आता आयपीएल 2024 च्या हंगापूर्वी हार्दिक पांड्या पुन्हा मुंबई इंडियन्समध्ये दाखल झाला आहे. मुंबईने हार्दिकला गुजरातकडून ट्रेड करून आपल्या गोटात खेचलं. यासाठी मुंबई इंडियन्सने गुजरातला 15 कोटी रूपयांपेक्षा जास्त रक्कम दिली आहे.

(Sports Latest News)